ORANJESTAD (AAN): Lectornan di DIARIO pa awor sa caba, cu si acaso bo ta bay bende un smartphone caro, mihor bo palabra pa topa cu e cumprado dilanti cualkier Warda di Polis riba Aruba.
Sea den parkinglot of net na e porta di Warda di Polis. Esey ta conseho cu a wordo duna mas di 20 biaha caba den DIARIO, mirando ta cuanto hende a bira victima di casonan asina.
Nunca laga cumprado bin bo cas, of top’e den auto na un lugar caminda casi no tin luz.
Tabata Diaranson anochi banda di 9:00 pm cu a sali na cla cu otro persona a bira victima. Esey ta ora cu un victima femenino di inicial R.A. a presenta pa entrega denuncia di ladronicia di su Apple iPhone 15 color blauw cla.
Segun e dama R.A., cu e dia ey el a pone un “For Sale” riba social media pa bende su iPhone. Un homber riba Facebook cu ta usando e nomber C. (kizas e ta un account falso) a mande un mensahe y bise cu e ta interesa pa cumpra e iPhone.
Despues C. a mand’e mensahe via Whatsapp cu e por bin na Driemasterstraat cerca di Caya Frere Federicus pa asina cumpra e iPhone.
E dama R.A. a bisa Polis, cu el a laga e homber C. sinta den su auto pa asina mira e iPhone, pa check cu e ta traha, pa check e status di bateria, etc.
Pero diripiente e homber C. a dal porta habri, y cu e iPhone den man el a core bay pasa den un pasiyo mey-mey di dos cas y desaparece den scuridad. E dama a keda pues cu porta di auto habri, y sin su iPhone.
E cos aki lo no a socede nunca si e dama a palabra pa topa dilanti Warda di Polis. Si e cumpradornan nenga di topa dilanti Warda di Polis, ya bo sa cu ta otro intencion nan tin.
Awor autoridad ta investigando e caso. Kizas via e number di Whatsapp, y tambe e IP address cu el a usa ora di manda message via Facebook, nan por pinpoint unda e messagenan a wordo manda.
Ademas cu e sistema di ‘Find my iPhone’, e dama R.A. por ‘desactiva’ y lock e iPhone horta di tal forma, cu su Apple-ID ta keda valido riba dje, y hamas otro hendenan por usa su iPhone sea na Aruba of otro pais.
