ORANJESTAD (AAN): Tabata siman pasa Diahuebs banda di 8:40 pm, cu Central di Polis a wordo notifica cu un auto a caba di dal un peaton.
Mesora a manda unidadnan di Polis di San Nicolas rumbo pa Arena’s Sports Bar den Bernhardstraat.
Tambe mesora a notifica Centro di Alarma, cu a manda unidad di Ambulans tambe na e lugar aki.
E prome unidad di Polis cu a yega, a bin topa cu un victima di edad grandi abao riba caminda, cu golpi na su curpa. Polis a identifica e victima como un persona masculino di 87 aña di edad. A haya informacion cu un auto color preto a dal’e, y despues djis sigui core bay.
Ambulans a yega rapido, y mesora Paramediconan a bin tuma señal vital, pa check su dolornan, y stabiliza su situacion. Pero mirando e condicion cu e ta aden, nan a opta cu lo bay di biaha rumbo Hospital cune pa atencion na Servicio di Emergencia.
Polis a manda busca Specialista di Trafico pa asina haci nan investigacion. Polisnan a keda papia cu mas hende pa check si por haya mas detaye di nan. Hecho ta cu Cuerpo Policial ta condena rotundamente e hecho aki, na unda ta dal y herida gravemente un ciudadano di edad respeta di 87 aña y lage attas sin brind’e yudansa.
Polisnan ta haciendo un suplica na e persona cu tabata tras di stuur di e auto ey y comete Hit & Run, pa entrega su mes door di yama Central di Polis na telefon 100.
Cuerpo Policial ta pidi es cu a wak algo of sa algo pa manda un whatsapp na 597-5194 cu ta e linea di departamento di trafico. Nan ta desea pronto recuperacion na e victima.
