Oficialnan di Polis Nuñez Bahamón y Willems a ricibi reconocemento special

Nan a rescata un baby na lama

ORANJESTAD (AAN): Recientemente na Centro di Husticia na Santa Cruz a tuma lugar un reconocimento na dos agente policial pa cu un incidente cu a tuma lugar dia 18 maart 2022.

   Ta trata aki di agente policial Henry Nuñez Bahamón y Wesley Willems. Alto comisario suplente sra Irma Gordon a elogia y gradici e dos agentenan door di a actua lihe pa por a salba bida di un criatura dia 18 di maart 2022.

   Ta asina cu e dos agentenan a conta cu e dia encuestion nan tabata riba patruya y pasando banda di Linear Park nan ta worde acerca pa un señora. E señora ta informa e dos agentenan cu tin un baby cu a bira hopi malo banda di lama y no ta halando rosea bon.

   Na e lugar e agentenan ta topa cu un grupo di hende cu ta rondonando un baby. Di biaha a puntra si a pone ambulance na altura, di cual ningun hende no por a duna un contesta.

   Mirando cu e baby no ta reaccionando, e dos agentenan  di biaha a dicidi di pone e baby den patruya pa asina transporte cu maximo urgencia pa hospital. Patruya a informa central di polis y a pidi pa yuda habri caminda pa por yega mas lihe posibel  hospital cu e baby.

   Den e patruya e agente policial Willems tabata practica CPR riba e baby, y danki na esaki dado momento e baby a cuminsa reacciona. Na yega na hospital e personal di EHBO tabata wardando nan y asina a tuma e baby over pa sigui dune e asistencia medico necesario y a logra salba bida di e criatura.

   Di parti di Cuerpo Polcial Aruba , Alto comisario suplente sra Gordon a duna cada un, un reconocimento pa cu e acto bunita aki. Cuerpo Policial ta orguyoso di e dos agentanan policial Bahamón Nuñez y Willems.

   Danki pa e reaccion rapido y asina a salba bida di un criatura. Aruba y Cuerpo Policial ta orguyoso di boso.