ORANJESTAD (AAN): Diasabra marduga un unidad di Polis di Noord a ser manda na Bubali, den area di Super Food, como cu hendenan tin un posible ladron wanta cu nan a caba di gara ta horta.
E persona tabata coriendo auto, y a baha pa horta mercancia. Habitantenan a gare.
Pa 4:05 am, e unidad di Polis a cuminza mobiliza pa e area. Diripiente informacion a drenta cu e homber a cuminza bringa cu e habitantenan.
Polis a yega y mesora a ricibi informacion di e señora victima di inicial S., kende a bisa cu algun ora mas prome caba nan a entrega keho di ladronicia for di su auto cu tabata staciona pafo di e establecimento di ‘The Office Club’ na Palm Beach.
Video di ladronicia: E señora victima a bisa, cu despues cu e unidad di Polis a tuma keho di e ladronicia for di auto, nan mes a bay y cu yudanza di gerencia, a bay revisa e video di e Security Camera cu ta graba tur cos riba parkinglot. Riba e video por a mira claramente cu un homber a bay na su auto, y di eyden a saca 1 tas y un rugtas. Despues bo ta mira riba e video, con e homber a cana bay cu un muher.
Den e rugtas e tabatin 1.000 Dollar cash.
E señora victima a core notifica dos amigo di dje, pa bise kico a pasa. El a saca screenshot di e grabacion di video, y a mand’e pa e amigonan pa asina nan mira ta con e homber y e muher sospechoso ta, por si acaso nan topa cune riba caminda.
E amigonan ey a dicidi na bay banda di e lugarnan nocturno, y ora cu nan a pasa na Lekker Bar na Noord, nan a bin reconoce e pareha ey! Pero nan a ripara esaki, net ora cu e pareha ta bandonando e lugar den un Toyota Passo.
E amigonan aki a dicidi pa bay sigui e persona aki, y mesora a yama e señora victima pa bise cu nan ta coriendo tras di e dos sospechosonan. E señora victima S. tambe a core sali for di The Office y subi caya.
Yegando den Bubali, nan a bin mira e Toyota Passo atrobe, y nan a dicidi na blokea e vehiculo aki, bula mesora for di auto y bay mira paden di e auto. Enberdad, e tas bruin di e señora victima S. tabata den baul poni, pero tabata completamente bashi. E otro tas nan no a haya.
Polisnan a mira e Toyota Passo ainda dilanti un cas na Bubali, y e ta pega contra cura di e cas. Banda di dje nan a bin haya e ladron di inicial C., ainda cu un cuchiu den man.
Polis a dune ordo pa benta e cuchiu abao, y nan a detene como ladron, y di a viola Articulo 2:397 di Codigo Penal di Aruba. E muher di inicial G. tambe tabata para banda di dje, y e tambe a wordo deteni, acusa di mesun violacion di ley.
E auto Toyota Passo a wordo confisca tambe, y cu Takelwagen a wordo hiba pa Warda di Polis na Shaba.
Nan a confisca e cuchiu, y tambe e rugtas bruin, y a wordo pasa na Recherche.
Un bon trabao di e victima, su amigonan, y tambe di Polis cu asina ta bay haci mas investigacion pa deduci ta den cuanto caso mas di ladronicia e pareha aki ta envolvi. No ta conoci cuanto material mas a ser haya den e baul.
