ORANJESTAD (AAN): Riba Diahuebs marduga banda di 1:45 am, net ora cu Polisnan di patruya di San Nicolas ta pasando riba e caminda di asfalt na Mangel Halto,
diripiente nan a topa cu un Nissan March color roos, para banda di caminda dilanti un cas cu tin adres Pos Chikito.
Polisnan a mira claramente cu tin un muher sinta na stuur, y den su man e tin un flashlight. Ora cu Polisnan a para nan vehiculo y yega cerca di e Nissan March, e agentenan a mira claramente con e muher a cuminza trata di sconde cierto cos den auto.
Agentenan a puntre ta kico e ta bezig ta sconde, y e muher a declara cu simplemente e ta buscando su cartera cu durante dia el a perde den e area ey.
Mientras Polisnan ta papiando cu e muher, e agentenan a mira claramente cu e muher aki ta bao influencia di droga of otro substancia. Esaki nan a deduci pa cu e forma cu e ta papiando, su wowonan cu tin pupil hopi hancho, y e movimento di su boca y kaak ta hopi raro mes.
Polis a cuminza papia mas fuerte cu e muher, y el a identifica su mes como D. Polisnan a pidi’e pa e baha di su auto, y el a cumpli cu esey.
Den e auto, Polis a mira monton di atributo di humamento pa droga, e.o. pipanan robusto traha na cas mes, lighters, algun potchi chikito di plastico conteniendo sas di cigaria, y puiro blanco similar cu cristal.
Tur e productonan aki a wordo confisca y a ser hiba Warda di Polis. E muher no tabatin cedula den su poder, y tabata duda hopi ta ki adres e ta bay duna.
Polis a tuma nota di tur esaki y a notifica Central di Polis di esey.
