Turista di 13 aña den accident fatal
ORANJESTAD (AAN): Algo no a bay bon durante cu un grupo di hende a subi riba un flota di rubber, pa asina diverti mey ora cu loke ta wordo yama ‘Tubing’.
Tubing ta un flota cu hende ta sinta riba dje, wantando duro, mientras cu e ta wordo lastra door di un speedboat. Ora di Tubing na momento cu bo pasa riba un ola, esaki hopi biaha ta bay halto y si bo no tin suficiente forza, bo ta wordo ‘benta’ un banda den lama.
Tin indicacion cu Diaranson atardi un poco prome cu 4:00 pm, esaki a pasa cu un teenager femenino kende a sali cay durante e Tubing y a cay den lama. Pa su malasuerte, un boto a pasa y a dal riba e dama hoben aki, lagand’e bastante herida.
Cu urgencia esnan di e Tubing a hise y a bay cune rumbo pa e landing point di nan cu ta net pazuid di De Palm Pier na Palm Beach, net mey-mey di RIU Palace Hotel Aruba, y Hilton Aruba Caribbean Resort.
Central di Polis mes a haya e melding banda di 4:00 pm, y mesora varios unidad di Strandpolitie, y Polis di Noord a mobiliza pa De Palm Pier pa duna un man. Centro di Alarma na su turno a manda dos unidad di Ambulans cu rapidez pa e lugar ey.
Ora cu Paramediconan a yega, a bin haya un grupo di turista tur conmociona rond di e mucha muher di 13 aña, cu ta abao na rand di lama riba beach, cu pulso hopi debil mes. Esaki tabata momento cu e Paramediconan a cuminza coordina cu otro pa asina trata na stabiliza e mucha muher cu visiblemente ta den situacion grave.
Ademas di a pone infuus, nan a cuminza cu CPR riba e dama hoben. Mientras tanto e mama y tata tabata dunando Polis informacion riba nan yiu, pero cu hopi tristeza y angustia ta mira con e profesionalnan ta trahando pa reanima nan yiu. Otro unidad di Polis a bay atende tambe esnan di Boto.
Sinembargo no a logra stabiliza e dama hoben mas, y su curazon no tabata reacciona mas, ni maske kico nan a haci.
Paramediconan a raporta na Centro di Alarma, cu no por haci nada mas y segun reglanan di Aruba, e ora tin di un Docter pa bin eynan.
Vocero Policial suplente a confirma na DIARIO, cu pa 5:29 pm, Dr. Texier a constata morto di e dama hoben di inicial C.M., di 13 aña di edad naci na Merca.
Polisnan a pidi presencia di demas autoridad, y tambe Bureau Slachtofferhulp pa bin duna un man.
Na famia di e fayecida, DIARIO y Cuerpo Policial ta manda palabranan di condolencia.
