Motociclista a resulta herida cu fractura serio na un pia  

Accidente pisa entre auto y brommer

ORANJESTAD (AAN): A sosode un accidente entre un Scooter y un auto Toyota color blanco diasabra anochi pasa di 9'or y mey.

            E accidente a tuma luga ariba un t-weg na momento cu e Toyota a bay bira na su man robes pa drenta un caya. E auto posiblemente lo a baha velocidad y lo no a pone señal cu e lo bira na su man robes.

            Patras di dje tabata biniendo e scooter y esaki a bay pas'e na su banda robes, pero a hay'e cu sorpresa momento cu e Toyota a bira y drenta e caya.

            Por a mira cu e Toyota tabata tin un impacto basta duro. E motociclista a resulta herida cu fractura serio na un pia.

            Ambulance a wordo pidi cu urgencia y Paramediconan a bay atende e motociclista y despues stabilis'e pa e wordo transporta pa Hospitaal.

            E agentenan a papia cu e chauffeur y na Hulandes nan a splic'e un ke otro. Ora di uza e Alco-Sensor el a surpasa e limite di alcohol stipula pa ley. El a wordo deteni eynan mes y cu transportwagen hiba pa warda di polis.

            Polis di trafico tambe a presenta na e sitio.