Autoridadnan investigando caso misterioso di homber haya morto na Mabon

Investigadornan ta protehando nan mes cu paña special

ORANJESTAD (AAN): Bisiñanan ultimo dia- y simannan a bin ta ripara cu e habitante di un cas na Caya Tapushi na Mabon no ta canando pafo den cura, ni sali riba acera unda tin biaha e ta haci su alabanza religioso.

   Aparentemente FCCA tambe no tabata haya contacto mas cune, y pesey a manda funcionario eynan pa asina papia cune riba cierto asunto.  Pa nan sorpresa ora di yega Diabierna atardi, despues di un rato lo a bin topa cu e curpa sin bida di e homber den e cas.

   Esaki a pone cu mesora a bati alarma!  Central di Polis a manda patruya di San Nicolas, y tambe unidad hudicial di Recherche pa check e asunto.  A manda busca Docter tambe pa constata morto.

   Pa por descarta cualkier teoria cu lo por tin algo inusual cu e morto aki, a pidi team forensico di BFTO pa bay saca potret y documenta tur cos, y tambe a pone Fiscal na altura.  Por a mira trahadornan a drenta cu Paña special di P.E. pa drenta e cas, incluyendo mascara cu filter.

  Habitantenan eybanda a indica cu nan no a haya “ningun holor desagradabel” e ultimo simannan aki.  Pasobra hopi biaha ora un hende tin basta tempo morto, e “holor” di morto lo plama y tur hende lo por sinti esaki.

   Pero esey no a socede.  Ademas di esey, hopi bisiña di berdad no tin mucho contacto cu e habitante aki.  Pasobra e ta un persona cu na numeroso ocasion a busca problema cu casi tur di nan.  Esey a pone cu bisiñanan no ta ni preocupa si acaso e ta canando den cura of no.  Esaki por splica e motibo di con ningun hende no a ripara su ausencia.

   Nan ta pensa cu e persona aki lo no tin famia na Aruba tampoco.  E ta un persona di edad grandi, y nunca a yega di mira famia ta bishitando.  Leu-leu tin un persona cu sa dune lift y trece bek na cas.  Pero e persona nunca ta baha pa bay cune paden.

   Ora cu a saca e cadaver, a usa paña special di P.E., cu ta tapa full nan cabez, y nan zapato, y mascara pa asina recoge e restonan mortal y hink’e den un Van blanco.

   Te na cierre di e edicion aki, autoridadnan oficialmente no a duna ningun detaye di e caso aki.  Na famia y amigonan di e fayecido, DIARIO ta extende palabra di condolencia.