Mobile Home a kentel net un tiki y mata trahador di Takelwagen

Caso tristo na Cura Cabay -  ORANJESTAD (AAN): Algo no a bay bon cu e transporte di un Mobile Home, y lo inimaginable a socede y na final e trahador di un Compania di Takelwagen a perde su bida tragicamente.

   E Mobile Home (yama tambe ‘Trailer Home’) tabata wordo lastra cu haak riba patras di un vehiculo Isuzu Heavy Duty di e compania 2Fast4U Towing and Roadservices.  E vehiculo Isuzu aki ta un takelwagen cu tin e haak grandi colga patras.

   Ora di yega un adres na Noord Cura Cabay 128-B, ta e lugar caminda nan tin di bay entrega esaki.

   Pa pone e Mobile Home den e cura di cas, e vehiculo di Takelwagen a reverse pa asina hiba e Mobile Home color geel riba e tereno smal.  Banda robez di e vehiculo y e Mobile Home tin un espacio masha chikito mes (‘franha fini’) di e tereno ey, y e muraya di cura di e bisiña.

   Mientras e chauffeur di e Takelwagen tabata reverse poco-poco pa bay paden cu e Mobile Home, su asistente tabata para den e franha fini pa asina guia e chauffeur ora di reverse.

   Aki ta unda algo a socede y no a bay bon.  Tin diferente version di loke a pasa, pero finalmente ta Recherche hunto cu personal di DTI y demas instancia tin di bin cu e resultado final.

   Un teoria ta cu e Mobile Home a djis kentel un tiki cu 5º y esaki tabata suficiente pa henter e trailer aki a primi e asistente contra e muraya di cura di cas di bisiña.

   Aki tin di bay investiga, si acaso ta e cadena cu ta wanta e Mobile Home a los un tiki, of kizas ta e as di e wielnan di e Mobile Home a dobla, of si acaso algo otro a socede cu e Takelwagen, cu a pone e obheto pisa aki zwaai na man robez y primi e Asistente contra muraya.

   Vocero Policial a indica cu tabata 10:54 am, e yamada urgente a drenta na Central di Polis di e caso aki na Noord Cura Cabay.

   Vocero Policial a bisa cu e prome informe ta cu un trailer a cay riba un persona.  Asina a cuminza manda tanto Polis, Ambulans, y tambe Vehiculo di Rescate di Cuerpo di Bombero.

   Ora cu Polis a yega, nan a nota cu e persona no ta reacciona y kizas no tin señal vital mas.  Pero e tabata pega ainda, y personal di Vehiculo di Rescate a traha pa asina libera e persona di su situacion penoso.

   Paramediconan a trata na reanima e victima, pero esaki tabata envano pues no tabatin signo mas di bida.  E ora a pidi Centro di Alarma pa manda Docter na e lugar.

   Docter Texier a yega, y pa 11:27 am a constata morto.  Vocero Policial a divulga cu ta trata aki di Gregory Steven Panneflek, naci na Aruba dia 2 di Maart 1986, pues tin 35 aña di edad.  E ta conoci pa su amigo y famianan como ‘Greg’.

   Ademas di personal di DTI, fotografo di DIARIO a tuma nota cu e funcionarionan forensico di Departamento di BFTO a bin na e lugar pa haci e investigacion, y yuda determina pakico e Mobile Home a kentel.

   Tambe a nota personal di Slachtofferhulp tabata yuda consola e chauffeur di e Takelwagen cu tabata inconsolable.

   Personal di Ad Patres Funeral Home a presenta pa transporta e restonan mortal.

   Greg Panneflek ta un persona hopi stima entre su coleganan, y el a wordo describi como un persona cu semper ta disponible pa yuda den cualkier situacion.  E ta un persona trankil di caracter y semper a trata tur hende cu respet.

   Na famia y coleganan, DIARIO ta extende su mas profundo palabra di condolencia.