ORANJESTAD (AAN): Investigacionnan cu a cuminza algun tempo pasa, awor ta ser controla y revisa door di un team special cu ta dedica pa check tur lugar, cas, y skinanan na Aruba, unda ta conoci cu tin droga ta worde bendi cu publico.
Esaki ta cay bao di un equipo cu den Cuerpo Policial ta ser yama ‘Project Team Drugspanden’.
Riba Diamars, nan tabatin suficiente informacion pa asina ehecuta un razzia. Asina e personal di Project Team Drugspanden cu yudanza di mas instancia, a subi caya y na final a detene 5 persona y a confisca varios atributo y droga.
Project Team Drugspanden ta un team cu a worde lanta pa entre otro investiga bendemento di droga for di un cas.
Esaki a socede Diamars ora cu Project Team Drugspanden a bay na un cas den Johan de Wittstraat, cu ta e caya cu ta core paralelo cu Avenida Alo Tromp den sector di Rancho.
Vocero Policial Lito Lacle a confirma cu den e razzia, a detene hende y confisca droga.
En conexion cu un investigacion andando Project Team Drugspanden a bay banda di un cas na Johan De Wittstraat y a detene 5 homber pa bendemento di droga:
Esnan cu a ser deteni ta e homber K.M.H. di 25 aña naci na Aruba. Tambe e homber C.R.Q. di 57 aña naci na Aruba. E homber S.Q. di 61 aña naci na Aruba. E homber C.B.Q. di 32 aña naci na Aruba. E homber M.J.L. di 44 aña naci na Aruba.
Durante e razzia a confisca un cantidad di droga. Vocero Policial a describi esaki como ‘Piedra’.
Ademas di bendedor, e unidadnan di Polis a topa cu algun cumprador tambe. E oficialnan a interoga nan pa asina haya sa nan nomber y declaracion di loke nan a bay cumpra eynan.
Lacle a bisa, cu pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nan tipline di Polis cu ta: 111-41. Nan ta garantiza cu bo ta keda anonimo.
