ORANJESTAD (AAN): Tabata Diadomingo anochi banda di 10:30 pm, ora cu unidad di Polis di Playa ta coriendo den Professor Lorentzstraat na Playa,
ora di a yega na e cruzada di Weststraat, nan a mira con un auto blanco a bira bay zuid den verboden riba Weststraat.
Weststraat ta un caya di un solo direccion eynan. Polis a bay su tras y a para e auto aki na altura di un Supermarket den Weststraat. Aki Polis a nota cu ta trata di un Hyundai i10.
Ora cu a papia cu e chauffeur, el a bisa cu e no sa mes cu el a core den direccion prohibi. A resulta despues cu e chauffeur no tin rijbewijs tampoco, y esey ta splica tur cos.
Na momento cu Polis tabata papia cu e chauffeur, nan a haya holor fuerte di marihuana. A base di esey, agentenan a pasa pa controla e Hyundai i10. Ora cu a pidi e chauffeur baha, nan a mira cu e tin un rugtas poni bao di su pianan. Tabata parce comosifuera e ta tratando di sconde esaki di basta rato for di bista di polis.
Den e rugtas aki, Polis a haya un boter di glas conteniendo un cantidad di marihuana, tambe sakitonan di plastico transparente cu puiro di cocaina, sakitonan di plastico transparente cu varios pildora. Tambe a mira un sakito di plastico transparente conteniendo papelnan di LSD strip, un grinder di hero cu ta contene marihuana tambe, un baki di metal cu tin varios sakito mas conteniendo marihuana. A haya un grinder blauw cu tambe ta contene marihuana.
A haya dos balans pa pisa tur cos.
Polis mesora a sospecha cu aki ta trata di un dealer di droga, pues aki nan a dal un ‘Bingo’.
Mas unidad di Polis a yega cerca pa duna un man, y asina a detene e chauffeur di inicial D. El a wordo deteni y hiba na Warda di Polis.
A manda busca unidad di UGC, cu ta encarga cu Crimen Organiza, cu a yega eynan pa asina confisca tur cos. Nan lo start un investigacion cu sigur lo habri caminda pa mas detencion den futuro.
Aki por mira claramente cu na Weststraat tin claramente borchi di ‘Verboden’ poni pa bo no drenta den e direccion ey.
