Manehador di ATV transporta den estado critico pa Hospital

Polis a habri tur caminda pa Ambulance

ORANJESTAD (AAN): Tabata Dialuna atardi alrededor di 5:15 pm, cu a registra un accidente serio cu vehiculo ATV (‘quadracer’) riba e T-weg banda di Colegio Pastoor Kranwinkel na Paradera.  Testigonan cu a bin topa cu e sucedido, mesora a bati alarma y informa autoridad cu ta trata aki di algo grave.

   Den un rato di ora, diferente unidad di Polis y tambe Ambulance a yega na e lugar di accident.

   E prome unidad di Polis cu a yega, a bin topa cu un persona masculino abao riba caminda, cu su cabez cerca di e acera y e no tabata reacciona.  Mas panort a mira su vehiculo ATV benta, casi riba e caminda grandi di Paradera pa Babijn.

   Polis a nota cu riba e caminda tin un rastro basta largo y segun polis tin un punto unda e lo cay cu e Quadracer.  E teoria ta cu kizas velocidad poco halto a pone pasa over di e Verkeersplateau riba e caminda dilanti Misa bay pa e scol, y a bay na su man robes.

   Eynan a ATV a bay di banda lastrando, y sacando e manehador bent'e pariba di caminda.

   Rapidamente Paramediconan a yega, y a lant’e  di eybao, y transporte cu urgencia pa Hospital.  Esey ta debi cu e horario di 5:00 pm pa 6:00 pm ta hopi druk tur caminda.

   Mientras tanto, Polis di Trafico, y team forensico di BFTO, y demas instancianan manera Bureau Slachtofferhulp tur a wordo poni na altura mirando e seriedad di e accidente.