Maltrato mahos contra un dama den Italiestraat

ORANJESTAD (AAN): Tabata den oranan di atardi, cu Polis a ricibi yamada cu un maltrato di pareha a caba di sosode cerca di algun negoshi riba extension di Italiestraat cerca di Avenida Nelson Oduber.

   Mesora unidad di Polis a ser manda na e adres, pa atende e caso lamentabel, unda cu un muhe a wordo maltrata door di su pareha.  Polis a yega y nota cu e dama tin basta golpi na curpa, y pesey a solicita presencia di Ambulance.

    Polis a bin haya sa, cu despues cu e dama a wordo maltrata, el a wordo cera pafo di e Apartamento unda e ta biba.

   A ser splica na Polis, cu esaki no ta prome biaha cu e homber ta haci e tipo di cosnan aki. E biaha aki e homber a tende cu Polis ta bin, y e ora si e rabo a krul y el a core drenta paden y cera su curpa den e Apartamento.

   Polis a logra convenc’e pa e habri e porta bisand’e cu e pareha ta herida.

   E homber a sali, y el a wordo deteni eynan mes ora cu el a habri e porta.  Aki por mire ora cu ta wardando yegada di e Van di Transporte di Cuerpo CEA, pa bay cu ne na Warda di Polis.  Aki el a wordo hiba dilanti Fiscal Auxiliar, pa asina atend’e riba e maltrato severo aki.

   Mientras tanto, Ambulance a yega y Paramediconan a atende cu e dama su heridanan.

   Manera semper, e dama tin e ultimo palabra si e ta para fuerte si e ta sigui of haci denuncia contra e homber.