Madruga a intercepta boto cu 11 persona indocumenta

Traficacion di hende ta sigui na ordo di dia

ORANJESTAD (AAN):  Diaranson madruga banda di 12:00’or di mey anochi, e Radar-Room di Cuerpo Polis Aruba (CPA) a detecta un contacto riba radar den area pabao di Aruba.  E radar ta mustra cu ta trata aki di un boto cu a bin for di zuid.

   Mesora a notifica Guarda Costa di Caribe Hulandes, kendenan mesora a saca nan speedboat specializa cu yama Metal Shark pa bay intercepta e boto.

   Alrededor di 12:30 am, e unidad aki di Guarda Costa a intercepta un lancha  cu 11 persona indocumenta abordo, di cual 10 persona ta masculino y 1 femenino.

   Guarda Costa di Caribe Hulandes a trece e lancha paden na nan post na Savaneta.  Nan a detene e persona abordo cu a fungi como Capitan y su ayudante.  Nan detencion ta pa nan wordo acusa di traficacion di hende.

   E dos personanan aki a wordo pasa pa e Unidad di Traficacion di Hende di CPA pa mas investigacion.
   E demas 9 personanan a wordo traslada pa seccion di Guarda Nos Costa (GNC), cu ta bay tuma tur nan dato y demas proceso.

   Algo di aplaudi ta e hecho cu e accion aki a bin como resultado di bon cooperacion entre cuerponan di Guardacosta di Caribe Hulandes, Cuerpo Policial di Aruba y Guarda Nos Costa.