ORANJESTAD (AAN): Dialuna anochi a presenta na Warda di Polis na San Nicolas un homber kende tabata sangrando na su cabez, y diferente herida mas na su curpa.
E homber a declara cu algun minuut prome el a bira victima di robo na Zeewijk. El a bisa cu e no conoce e bario ey bon, pero el a splica cu el a wordo invita pa bay eynan door di un amigo.
Pues el a bay cu su Scooter pa eynan. Ora di yega, el a cana bay na un Apartamento unda el a pensa cu su amigo lo ta biba. Aki el a wordo ataca door di tres homber desconoci. Uno di nan ta bisti cu un hoodie, y pesey no por a reconoce bon. E otro homber tabatin un petchi cu ta tapa casi full su cara, y no por a reconoce.
E trio aki a cuminsa dune un sota y golpi a keda skeiro, y na final herida banda di su orea robez a cuminsa sangra. E tabatin varios rasca na su cara. E tabata keha tambe di dolor na su curpa debi na tantisimo scop y mokete cu el a haya.
E trio desconoci aki a bay cu su dos smartphone, y su tas conteniendo como 800 Florin. El a purba na bringa cu nan, pero nan a drenta den un auto blanco. Debi cu e no conoce e bario, el a splica cu esaki ta un tereno unda tin un Mobile-Home riba dje, y patras di esey tin un apartamento.
Polis a core yama Ambulance pa bin check e victima na Warda di Polis. Autoridad awor tin atencion pa e caso.
