ORANJESTAD (AAN): Diamars marduga pa 12:40 am, un unidad di Polis di San Nicolas a ser manda na Pieterboerstraat pa check un situacion sospechoso.
Ora cu a yega na e lugar, e unidad di Polis a papia cu e señora di inicial R. Segun el a splica na autoridad, cu e ta traha pa e habitante di e cas ey den Pieterboerstraat. Actualmente e tambe ta bibando na Pieterboerstraat, y recien a haci e hardin y e tereno aki full limpi.
Pero Diamars marduga banda di 12:30 am, el a tende con cachonan ta blaf constant dilanti cas. E sa cu otro banda di caminda tin un criadero chikito di carne y galiña. E habitante di Pieterboerstraat ta doño di e criadero aki.
E ora di anochi ey, e señora R. a dicidi sali di cas, y a bay otro banda controla e criadero chikito. Aki el a bin ripara cu tur galiña cu tabatin den e criadero a wordo horta! E momento ey R. no tabata sa exactamente ta cuanto galiña tabatin den e haulanan.
Pero a palabra cu den dia lo bay contact Polis un biaha mas, pa asina duna e conteo exacto y pa entrega keho di ladronicia.
Abo sa di hende den area di Pieterboerstraat, of Cura Cabay, of Zeewijk, of Brazil cu diripiente tin galiña desde Diamars mainta, por fabor yama Tipline di Polis na 111-41. Ban yuda stop hortamento di criaderonan rond di Aruba.
