ORANJESTAD (AAN): Dialuna anochi banda di 10:15 pm, un unidad di Polis di Noord a ser manda na un cas den caya Rubi pa check asunto cu a haya un smartphone horta.
Ora cu agentenan a yega na e cas, nan a wordo acerca pa e Director di un Restaurant kende despues a resulta di ta e ciudadano di inicial M. El a declara cu 3 dia pasa el a entrega denuncia na Strandpolitie di ladronicia di un Apple iPhone 11 color blanco.
Via di un aplicacion di Apple cu yama ‘Find My iPhone’, electronicamente y na forma scondi e ta busca pa check via data si e por comunica cu e smartphone horta, y si acaso e logra haya contacto, e ta keda silencioso, pero ta cuminza check señal di GPS pa asina trata na haya sa ta na ki parti di mundo e ta.
E biaha aki, e aplicacion di ‘Find My iPhone’ a trace y localiza e aparato na e adres ey na Rubi.
Atardi, e aplicacion a detecta cu e iPhone horta a cuminza ‘move’, y banda di 5:10 pm esaki a bay den area di Primavera.
Anochi nan a mira via e mapa, con e iPhone horta a move for di Primavera na Playa y a bay bek pa e adres na Rubi na Noord. Na momento cu Polis ta eynan na Rubi, e Director di Restaurant tin un otro aparato di Apple cune, y tabata mustra con e ‘location’ di e iPhone horta ta den e cas ey.
Doño di cas a sali: Polis e ora a dicidi na pita pafo di e cas na Rubi. Despues di un rato porfin e porta a habri y e doño di cas di inicial B. a sali. Agentenan a bay papia cune y a pone na altura loke ta pasando cu e smartphone Apple iPhone 11 horta cu a wordo localiza na su cas.
E doño B. a indica cu e no sa nada di smartphone, y el a dicidi pa bay busca su yerno (casa di su yiu muher) pa check si acaso e sa algo. E yerno a resulta di ta e homber di inicial K.
E homber K. a bin pafo, y na momento cu e ta saliendo di e cas, e agentenan a mira riba e app di ‘Find my iPhone’, con e smartphone horta ta moviendo for di mas paden di e cas y tabtaa bin dilanti di e cas rumbo pa agentenan.
Via di e aplicacion ‘Find My iPhone’ tabata posible pa bo primi un boton di ‘Sound Alert’, y esaki ta pone e smartphone horta diripiente emiti un sonido extra fuerte pa asina bo por haya sa unda e ta. Y dicho hecho, e sonido fuerte aki a cuminza sali for di e smartphone blanco cu e homber K. tabatin den su man drechi teni.
El a resulta di ta e Apple iPhone 11 horta mes!
Sin cu Polis a puntre algo... ata e homber K. mes a cuminza conta Polisnan diferente storia con el a yega na e iPhone 11 ey. Prome el a bin cu e storia cu e smartphone ey ta di un amigo di su welo, y cu e welo a dune e smartphone pa haci algo na e aparato, pero cu e smartphone no ta di dje.
Despues el a bin cu otro storia, esta cu e welo a haya e smartphone di un amigo, y e welo a dune e smartphone ey como regalo. Pues diripiente si e ta pertenece na dje. Increible!
E Director di Restaurant a reconoce Apple iPhone 11 aki como esun di dje, y riba cual tin un denuncia oficial haci.
A base di esaki, Polis a kita e smartphone di e homber K., y su mannan a wordo poni den boei como cu el a wordo aresta pasobra a viola Articulo 2:397 y Articulo 2:288 di Codigo Penal di Aruba.
El a wordo hiba Warda di Polis, unda Fiscal Auxiliar a duna ordo pa e keda deteni pendiente investigacion.
Pesey ultimo tempo, no ta vale la pena horta smartphone mas. Pasobra bo por localiza nan bek facilmente.
