ORANJESTAD (AAN): Diabierna anochi banda di 7:10 pm, un unidad di Polis di Playa a ser manda rumbo pa Bushiri Complex debi cu un hoben a caba di wordo maltrata cu un arma.
E unidad di Polis cu a yega den e area, a bin topa cu un hoben benta abao un tiki di banda mitar-lanta, dilanti un di e edificionan di e Compleho.
Polis a usa nan flashlight y a nota cu e hoben tin un cap na su enkel di pia robez, y tambe na e banda robez di su lomba. E momento ey tabatin tres hoben cu tabata yudando e victima.
Eynan cada biaha Polis a puntra e victima pa sa kico a socede, pero e no kier a coopera cu nada. A bin ripara cu e victima no kier coopera cu Polis pa asina haya sa e identidad di e sospechoso cu a comete e maltrato pisa aki.
Pero el a djis bisa globalmente, cu el a wordo ataca door di dos hoben. Uno di e hobennan cu a atake cu machete, el a reconoce.
E tres hobennan cu tabata yudando e victima, Polis a keda puntra nan varios biaha si nan sa di algo, pero tur a bisa cu nan no sa nada di e caso.
Polis a puntra un habitante di e cas na Bushiri tambe si acaso nan a mira algo. E habitante femenino aki tambe a bisa cu e no a mira nada, y no sa di nada.
Ambulans a yega, y Paramediconan a haya necesario pa hiba e victima rumbo pa Hospital pa asina atende e heridanan serio aki. Polis a pone personal di Bureau Slachtofferhulp y tambe oficialnan forensico di BFTO na altura.
