Cantidad grandi di marihuana a ser haya
- A topa cu arma di candela den e cas tambe
ORANJESTAD (AAN): Diaranson a habri cu accion di autoridad den oranan trempan di mainta.
Cu autorizacion di Ministerio Publico, a tene un razzia den area di Tarabana y San Barbola.
E grupo anti-droga di Polis, conoci como Unit Narcotica conhuntamente cu Team di Aresto a subi caya, y den un accion di sorpresa, a tene un entrada hudicial na un percela den Caya Luna.
Durante e entrada hudicial a detene dos persona. Ta trata di e homber di inicialnan A.S.S. di 28 aña di edad naci na Aruba, y e hende muhe di inicial G.D.J.T. di 25 aña naci na Aruba.
Durante e entrada hudicial a confisca un arma di candela, municion y cantidad considerabel di droga (marihuana).
Pa cu e accion en cuestion varios departamento a yuda entre otro Polis Uniforma, Flex Team, BFTO, K-9 di KPA y K-9 di Douane. Nan a tene control tur rond di e tereno pa evita cu hende por huy bay. Na final di e accion, por conclui cu cada uno di nan a eherce nan trabao bon, y e entrada hudicial tabata exitoso.
Investigacion awor den e caso lo bay den un fase mas profundo.
Cuerpo Policial ta keda haci un apelacion na persona cu sa of a wak algo pa yama e tipline di Polis na 111-41. Nan ta garantiza cu bo ta keda anonimo.
