Jenifer Vrolijk di 25 aña a perde su bida canando marduga na Tamarijn

Chauffeur di e vehiculo tabata bao influencia

• Di 12 morto den trafico pa 2024 na Aruba 

ORANJESTAD (AAN): Diadomingo madruga pa 2:20 am, yamada a drenta na Central di Polis pa indica cu un accident a socede riba caminda di Bloemond pa Tamarijn, y cu un auto a dal un peaton.

   Ora cu Polis di Santa Cruz a yega eynan, a bin nota cu e accident ta net 20 meter pabao di e cas Tamarijn 54, y ta un persona femenino ta benta na rand di caminda, sin señal vital.  Mesora a pidi pa Ambulance yega lo mas rapido posibel.

   Na e lugar aki na Tamarijn a bin nota cu no ta un auto a dal e dama, sino ta un vehiculo, esta un SUV Suzuki Vitara color shinishi.  E vehiculo a stop y a keda eynan, pues no a core bay.

   Na yegada di Ambulance, e paramediconan a core bay check pulso y demas punto vital di e victima, pero lamentablemente no por a haci nada mas pe. E ora a manda busca Docter pa yega eynan.

   Algun rato despues, docter di Polis forensico, esta Dr, Voskuil a constata morto di e dama Jenifer Jeanely Vrolijk, naci dia 28 di April 1999 na Aruba, pues tin 25 aña di edad.

   Polisnan a cuminza papia cu e chauffeur masculino di e Suzuki Vitara, y aki nan a bin nota cu e ta papia cu lenga pisa, y ora di ilumina su cara cu flashlight, a nota cu su wowo ta cora.  A haci un test di supla cune, y esaki a sali malo pe.

   Pues eynan mes na e lugar di e sucedido a detene e chauffeur di e Suzuki Vitara, pasobra a viola Articulo 5 inciso 2 di Ley di Trafico.  E chauffeur di riba 60 aña di edad a ser hiba pa Warda di Polis.

   Na e lugar a yega Specialista di Trafico, y tambe team di Departamento Forensico di BFTO, y personal di Bureau Slachtofferhulp.  Pa asina nan bay notifica famia cu nan ser keri a fayece.

   Posibel discusion riba caya: E victima no ta biba na Tamarijn ni vecindario.  Tin testigo cu a bisa cu nan a mira e victima baha for di un auto sedan Toyota Mark X color blanco cu number A-33596.  Tabatin discusion y gritamento mey-mey di caminda, net ora cu e Suzuki Vitara ta acercando, y a dal e dama.

   Por a mira cu e Toyota MarkX a keda para eynan, y Polis a atende e chauffeur pa haya su declaracion, pero oficialmente Polis no a bisa si acaso esey ta un testigo of amigo di e victima.

   Jenifer Vrolijk a bira e di 12 victima fatal di trafico pa 2024.  Hopi hende ta kehando cu e area ey ta hopi scur, aunke tin luznan briyante di LED instala.  Toch e palonan di luz ta hopi leu for di otro, y casi no tin rand suficiente pa hende cana.

   E victima Jenifer Vrolijk ta bay lagando su famia den pena, y tambe ta lagando un yiu chikito cu ta casi bay cumpli 3 aña di edad.  DIARIO como tambe Cuerpo Policial Aruba ta manda palabra di forsa na e famia di e fayecido.