Persona aparentemente no tin consenshi
- Hoben di 24 aña ta esun cu a dal Poy Croes mata na Pos Chiquito
ORANJESTAD (AAN): Dialuna siman pasa, esta 2 di December poco despues di 7:30 pm, un vehiculo moviendo direccion pariba riba Green Corridor, na altura di e parada di bus net pabao di Rey Hing Supermarket na Pos Chiquito, a dal violentamente un peaton masculino cruzando caminda.
E persona tras di stuur a lastra un brake di como 14 pa 16 meter, pero asina mes a dal’e persona hopi duro. Pa algun rato e auto desconoci a slow-down, pero par di seconde despues a djis sigui primi trot y desaparece bayendo pariba. Un persona sin consenshi, un persona cu aparentemente no kier asumi responsabilidad.
E victima masculino a wordo catapulta y bay cay den e via di direccion contrario, y pa malasuerte dos auto sedan cu ta bin di direccion contrario (pariba), a haya un bulto benta abao y a hala un poco pa no dal den dje, y despues cu nan a sinti basta golpi bao nan auto, a para y a bay mira ta kico. Asina a bin descubri cu ta un persona gravemente herida ta benta abao. Pues inocentemente e di 2ndo y 3er auto a pasa riba e victima.
Pues asina e ciudadano Ramon Rudolfo Croes di 66 aña conoci como ‘Poy’ a perde su bida. Polisnan mesora a papia cu numeroso testigo, a revisa varios Security Camera, y tambe a ricibi tip valioso via Tipline 111-41.
Asina un team di Polis di Trafico a cuminza investiga e caso aki, y na forma yen precision a sigui traha riba e caso. Asina a logra acumula prueba y demas dato, y seis despues di e accident ya nan a haya sa nomber di e persona. Diadomingo mainta prome cu 12’or di merdia, unidad di Polis a mira e persona ta coriendo den un Toyota Yaris color cora cu number A-70417 riba e caminda di Paradera pa Santa Cruz. A dune señal pa stop, pero e no a haci caso. Mesora Polisnan a pidi refuerzo, y tanto patruyanan di Santa Cruz, Playa, y Noord a mobiliza cu urgencia.
Exactamente otro banda di caminda di e adres Piedra Plat 9, cu ta como 65 meter prome cu rotonde di Piedra Plat, un unidad di Santa Cruz a bay mey-mey di caminda y blokea su continuacion. Mesora Polisnan a core baha, a detene y pone mascara riba su wowo pa e no mira e oficialnan cu a pone sinta abao y cuminza contesta pregunta.
For di prome bista e tabata parce di ta nonchalant, comosifuera e no sa e embergadura di a ocasiona un Hit & Run fatal.
Vocero di Polis Liliana Rasmijn, a confirma cu ta trata aki di e persona busca. El a wordo identifica como S.R.J.T. di 24 aña di edad, naci na Aruba. El a wordo hiba dilanti Fiscal Auxiliar, kende a revisa su folder y mesora a duna ordo pa e keda deteni.
Polis di Trafico pues a traha incansablemente pa resolve e caso di Hit & Run aki cu a trece hopi tristeza den famia di Poy na Pos Chiquito. A lo menos a detene, pero toch Polis ta pidi cu si acaso abo tin mas informacion of sa algo y kier keda anonimo, por fabor yama tipline di polis na 111-41.
