Impacto frontal na Shiribana a laga chauffeur pega den auto

ORANJESTAD (AAN): Dialuna anochi algo prome cu 8'or y mey ta sosode un accidente serio riba caminda principal di Kibaima pa Pos Abao, na altura di sucursal di Subway Paradera, den bario di Shiribana.

   Net e momento ey un unidad di Polis cu tabata hopi cerca di e accidente, a core dirigi nan mes mesora pa e lugar.

   Na yegada nan a topa cu un auto sedan Ford Fusion meymey caminda y un banda pa pazuid un Suzuki Swift color shinishi cu number A-4605 pega contra un cura di cas.

  Chauffeur di e Swift ta sinta banda drechi di e auto, y esey ta net unda cu e auto a bay pega contra muraya di e cas Shiribana 8-A unda ta bende Bingo.  Esey a pone cu el a keda pega y no por a sali.

   Mesora Polis a solicita presencia di Ambulans como tambe Vehiculo di Rescate pa yuda saca e victima di eyden.

   Testigonan a bisa cu e Ford Fusion tabata bayendo direccion pariba, mientras cu e Suzuki Swift tabata bayendo pabao.  Net na altura di e negoshinan aki e Suzuki Swift a kita na su man robes debi cu un auto a bay drenta e parkinglot di Subway.  Pa e no dal den dje, el a hala na banda robez.

   Den e maniobra, e Swift a bay dal den e Fusion dilanti banda drechi y ta sigui bay y termina contra cura di e cas Shiribana 8-A.

   Vehiculo di Rescate di Brandweer a yega e lugar pa yuda Paramediconan saca e chauffeur y pone den ambulance.  Caminda parti pabou a keda cera un rato pa e trabaonan y tambe pa por a hala e Ford for di caminda.