Caso serio riba Dialuna atardi
- Suplica pa cualkier testigo duna tip
ORANJESTAD (AAN): Tabata Dialuna atardi banda di 5:00 pm, cu e Supervisor di e asina yama ‘Tourism Security Patrol Aruba’ (TSPA) a contact Warda di Strandpolitie pa splica cu nan a wordo acerca pa un grupo di turista.
E turistanan a declara cu hendenan desconoci a pasa man y bay cu nan tas. E ora a manda un unidad policial, na Eagle Beach net pabao di La Quinta Beach Resort. E señora turista di inicial R., a declara cu e ta turista. E tabata cu su famia e dia ey na Eagle Beach. Tur nan articulonan tabata den un Shopping Bag grandi coor blanco, y nan a pone esaki bao di un palo di mata.
Den e Shopping Bag grandi aki nan tabatin dos Apple iPhone 14 Pro color biña, un Apple iPhone 14 color aqua blue, un Apple iPhone 13 color blanco, un Samsung Galaxy A71 color preto, bril di bista color preto, yabi di un Toyota Yaris, paña, 5 par di slof, 2 serbette.
Nan a bay landa for di 2:30 pm te cu 5:00 pm. Ora cu nan a sali for di lama, y bay pa e palo di mata unda nan a laga e Shopping Bag. Pa nan sorpresa e tas grandi aki no tabatey mas.
Net e ora ey nan a mira dos Polis pasando riba bicicleta, y nan a core yama atencion di nan riba e asunto.
Polisnan di Strandpolitie a tuma e denuncia, y awor tin atencion pa e caso.
Cualkier persona cu por a mira kende a pasa man pa e Shopping Bag aki riba Dialuna atardi, ta ser pidi pa yama Tipline di Polis na 111-41.
