Como 500 kilo di marihuana confisca
ORANJESTAD (AAN): Otro bon noticia di e siman aki. E barco cu recien a cuminza nabega rond di islanan di Caribe Hulandes como tambe resto di Caribe, esta Zr.Ms. Groningen y Wardacosta a intercepta un speedboat tipo Go-fast cu 500 kilo di contrabanda abordo.
E barco di Marina Real, Zr.Ms. Groningen cu ta nabegando pa Wardacosta di Caribe Hulandes, den marduga di Dialuna 22 pa Diamars 23 di Mei, a intercepta un transporte di droga riba laman Caribe.
Zr.Ms. Groningen cu apenas tabata 24 ora riba laman cu su patruyahe, a wordo informa pa Wardacosta Caribe Hulandes tocante a detecta un Go-fast sospechoso. Groningen a lansa e dos botonan rapido mesora, e asina yama FRISC, pa por stop e Go-fast.
E cuatro sospechosonan riba e Go-fast a keda completamente sorprendi y a entrega nan mes inmediatamente. E captura aki un biaha mas ta e resultado di un colaboracion intensivo hunto cu Wardacosta di Caribe Hulandes y e barco patruyero di Marina Real Hulandes, cu tin abordo un team Mericano di ‘Fleet Marine Squadron. E sospechosonan y e contrabanda a keda entrega na Wardacosta Caribe Hulandes despues di e interceptacion.
Un total di aproximadamente 500 kilo di marihuana a keda confisca cual entre tanto a keda destrui. Zr. Ms. Groningen for di mei 2023 ta activo como barco patruyero den Region Caribe y ta combina operacionnan anti droga cu sosten di Wardacosta di Caribe Hulandes y asistencia humanitario den e region Caribe.
