ORANJESTAD (AAN): Dialuna di anochi algun miembro di famia a bay den panico,
ora cu nan a bin haya carta cu un ser hopi stima a laga atras. E tabata pone mensahenan tambe riba social media, y e contenido aki a pone famianan core pidi yudansa di demas famia y amigonan pa check si nan por topa cu un vehiculo compact crossover SUV marca Mazda CX-5 color shinishi scur.
E persona a mobilisa cu e vehiculo aki cu ta pertenece na su pareha, y a desaparece. Famia a cuminza teme cu e persona jolly aki, diripiente lo a hay’e den un depresion fuerte y lo por haci daño na su mes.
Polisnan tambe a wordo envolvi, y buskeda a start.
Pero Dialuna anochi ey mes banda di 9:30 pm, a bin haya un vehiculo staciona na Arashi, basta panort di e parkinglot di e beach. A bin haya un persona masculino den e auto cu no tin señal vital.
Tanto Polis como Ambulance a mobiliza pa e area, pero ya no por a haci nada mas. Paramediconan a pidi pa manda busca Docter. Polisnan a core pidi tur autoridad halto yega eynan, incluyendo Recherche di Noord, cu a pidi mesora pa team forensico di BFTO yega pa documenta tur cos. E trabao aki a sigui te den oranan di marduga, y na final cu shersh di Funeraria a hiba e curpa sin bida.
E persona den e vehiculo ta e mesun persona cu famianan a cuminza core busca fervientemente. Docter a constata morto di e ciudadano O.A.B. di 35 aña di edad. E ta un persona basta conoci, semper admira pa su bon humor, su balentia, y tabata un deportista multifacetico den Softball, Baseball, Volleyball, y tambe Beach Tennis. E informe aki a shock su famia, amigonan, y coleganan di trabao, y tambe su amigonan den teamnan di deporte.
Na famianan di e fayecido, DIARIO ta extende su mas profundo palabra di condolencia.
