Homber haya benta abao den Venezuelastraat cu posibel golpi fuerte na cabez

Ta check si acaso ta Hit & Run...

ORANJESTAD (AAN): Diahuebs anochi den careda di 10’or, polis a bay direccion Venezuelastraat, unda e prome informe a drenta cu e detaye cu auto a dal un persona.

    Polis cu a yega a bin haya un persona masculino den uniform di Security drumi abao riba caminda.  Banda pazuid di caminda tin un bicicleta.

   Autoridad a tende di diferente persona, kendenan a bisa cu a bin hay’e abao riba caminda y nan ta pensa cu auto a dal’e y sigui core.  Polis a haci e persona drumi abao diferente pregunta, pero e tabata basta turdi ainda y no por a corda nada.

   A manda pidi presencia di Ambulance, y tambe a yama Polis di Trafico pa puzzle loke exactamente a socede.  A cuminza pensa cu kizas e mes tambe a dal contra un auto staciona, y despues a cay duro riba caminda.

    Ora cu Ambulance a yega, e Paramediconan a presta asistencia, y e persona keto bay tabata basta turdi y confundi cu loke a socede.  E por ta efecto di golpi fuerte na cabez.

   A dicidi na bay cu ne pa Servicio di Emergencia na Hospital, unda lo por check pa golpi interno den su cabez, y otro parti di curpa pa purba decifra loke a socede cu ne den Venezuelastraat.