Tin dos homber deteni
ORANJESTAD (AAN): Dos luna pasa, esta riba e marduga di Diadomingo 22 di Januari 2023, cu autoridad a haya informacion cu un pelea violento a keda registra den St. Maartenstraat den Village.
Na final, dos agresor a bay y laga un persona abao hopi bati, cu trauma y heridanan habri, cu tabata sangra profusamente. Mesora a core yama Polis.
E prome unidad di Polis cu a yega, a bin haya un homber abao benta tur na sanger, y a core pidi presencia mas rapido di Ambulans. Ora cu Paramediconan a yega, nan a core asisti e persona y a nota cu e victima ta basta grave.
Cu urgencia a transporte rumbo pa Servicio di Emergencia na Dr. Horacio Oduber Hospital, unda a stabilize un poco pero toch su situacion a keda critico. El a wordo hospitaliza, y a keda den situacion grave y den coma pa 53 dia den Hospital.
Diahuebs marduga, esta 16 di Maart 2023, a drenta e informacion for di Hospital, cu e victima a fayece. El a wordo identifica door di vocero policial como Michael R.V. Kock di 49 aña, naci na Aruba.
E caso serio di maltrato aki principalmente na su cabez, a cuminza wordo investiga door di Recherchenan di San Nicolas. Y como 13 dia despues cu e atake aki a socede, e oficialnan hudicial a detene un hende homber di inicialnan J.I.Q. di 20 aña naci na Aruba.
Despues di e aresto di J.I.Q. cu a socede riba Diabierna 3 di Februari 2023, Recherche a sigui haya mas informacion, y riba Diahuebs 9 di Februari a detene un otro hende homber di inicialnan S.D.W. di 49 aña, naci na Jamaica.
Nan dos keto bay ta deteni, y awor e acusacion riba nan a escala debi cu e victima di e maltrato severo aki a fayece.
DIARIO y Cuerpo Policial ta manda palabranan di condolencia y forsa na famianan di e fayecido.
