ORANJESTAD (AAN): Un biaha mas, residentenan di Betonicastraat y becindario a pasa un susto, despues di scucha varios disparo diabierna anochi.
Varios patruya a presenta na e lugar y segun informacionnan, tin tur indicacion cu ta trata di un 'drive-by shooting', mas tanto den direccion di un advertencia. Den e area, agentenan di polis a haya 3 huls y mesora a notifica BFTO pa compila evidencia.
Recherche a cuminsa un investigacion, hunto cu otro unidad di Cuerpo Policial, pa haya e responsabelnan y confisca armanan ilegal.
Esaki no ta prome biaha cu un tiramento of tipo di 'drive-by shooting' ta tuma lugar den e area aki. Habitantenan ta fada di e situacion y ta urgi tur instancia concerni pa tuma accionnan necesario pa nan por sinti nan mes safe den nan bario.
