Auto a dal ciclista teenager anochi laat na Koyari 

ORANJESTAD (AAN): Diabierna anochi algo pasa di 11:00 pm, Central di Polis a manda patruya di Noord cu urgencia pa e caminda di Koyari,

debi cu yamadanan tabata drenta cu auto a dal un persona riba bicicleta y e lo a keda abao benta riba caminda.

   E prome unidad di Polis cu a yega na e lugar di accident, a bin topa cu un hoben abao benta banda pariba di caminda riba acera di santo dilanti Koyari 33, y e tabata kehando di basta golpi rond di su curpa.  Su curpa a keda tur na santo.  E bicicleta mes cu e tabata coriendo a keda benta un poco mas leu, y esaki a keda basta destrui.

   Poco mas panort, esta dilanti Koyari 33-C por a mira un Toyota Altezza para na banda.  Polis a papia cu e chauffeur, y el a declara cu e tabata bayendo direccion nort y e bicicleta sin luz inespera lo a hala subi caminda, y e no por a haci nada mas y a dal’e.

   Paramediconan cu a yega, mesora a cuminsa prepara e hoben pa transport'e pa Hospitaal, pues a pone brace na su nek.  Polis di trafico tambe a yega e lugar pa tuma dato.