Accion lo a socede marduga
- Vehiculo 4x4 a logra huy di costa tambe
- No ta conoci si tabatin ilegal tambe a yega
ORANJESTAD (AAN): Unidadnan di Polis a mobilisa Dialuna mainta trempan na costa panort di e isla, ora cu a drenta tip cu tin ‘dropping di droga’ andando. E posibilidad ta existi cu e droga a spula na tera tambe.
Varios unidad di Polis a cuminza mobilisa pa e area, y e prome cu a yega a baha eynan cu arma fuerte den man cla pa defende nan mes. Aki a bin nota cu tin droga benta abao na tera, y tambe diferente bulto ta drief den lama. Tin rastro fresco di vehiculo eynan tambe.
Polis a logra confisca tur e bultonan aki, y a envolvi Unidad di Crimen Organiza (UGC) den e accion aki tambe. A sigui check varios baranca a lo largo di e costa, cu bista pa lama pa check si tin mas droga spulando.
Polis ta investigando e rol di un vehiculo 4x4 tipo Jeep cu tabata den e area tambe, cu a core bandona e area cerca di un Rancho, na momento cu e representantenan di ley a yega. Tin testigo a mira hendenan na e Jeep aki ta yenando e vehiculo cu droga, y a logra bay cu algun. E vehiculo no a core bay direccion Westpunt, pero mas bien a drenta mondi riba e ruta cu ta bay sali na bario di Boroncana na Noord.
Posibilidad ta grandi cu tabatin mas vehiculo cu a logra carga y bay caba cu pakete yena cu droga eynan, y e vehiculo 4x4 tabata e ultimo. E chens ta grandi cu e dropping a socede di marduga caba, y ta raro cu nan a logra di keda for di bista di e radar maritimo di Wardacosta, y di Radar-kamer di Cuerpo Policial.
Helicopter di Polis a duna un man tambe pa yuda controla barancanan y costa, y a confirma cu tin mas bulto ta drief den lama. Via di MOC Center, a manda pidi yudanza di Wardacosta di Caribe Hulandes pa yuda pisca e bultonan cu a keda drief riba lama.
E pregunta ta, acaso ta droga so a bin baha na costa? Kizas tabatin hende indocumenta tambe cu a haya cabe’i boto pa yega tera. Hecho ta cu oficialnan hudicial a cuminza cu investigacion y posiblemente tin pista ta kende ta envolvi den e acto aki di marduga cu a dura te mainta.
Te cu Dialuna anochi, oficialmente Polis ni Ministerio Publico no a duna un relato oficial di loke a socede na costa panort.
