Segun Lito Lacle di Sindicato SPA:
ORANJESTAD (AAN): Maneho di situacionnan relaciona cu personanan cu problema di salud mental ta representa un reto diario pa miembronan di Cuerpo Policial, particularmente pa esnan cu ta traha den straatdienst. Esaki, segun señor Lito Lacle di Sindicato SPA, kende a papia cu DIARIO diamars mainta.
Segun Lacle, actualmente tin un draft di un acuerdo entre Cuerpo Policial y Respaldo cerca Mando Policial pa evaluacion. E expectativa ta cu, unabes e acuerdo wordo firma, lo tin proceduranan mas cla pa polis sigui ora nan mester atende un situacion relaciona cu un persona cu problema di salud mental.
Lacle a splica cu actualmente intercambio di informacion entre Cuerpo Policial y Respaldo ta limita pa motibo di secreto medico. Respaldo no por comparti nomber of otro informacion medico confidencial di pashentnan cu polis. Sinembargo, segun e, por comparti e adres si na unda asistencia ta necesario.
Mientras e acuerdo ainda no ta formalisa, Lacle a remarca cu straatdienst ta acumulando un lista di personanan cu mas nan tin problema cu nan ora di asistencia y ta trahando cu e lista aki y ta comparti e lista entre nan te ora cu e acuerdo keda firma.
Di e manera aki, el a expresa, tur e hende ta na haltura cu e adres na unda cu nan mester duna asistencia, tin un persona cu tin problema mental. Mientras tanto, nan ta sigui preveni ora mester duna asistencia, sea cu e persona mester haya dijes un medicamento of si mester uza forsa pa bay cu e persona of Respaldo bay cu e persona.
“E draft di e acuerdo ta cerca Mando Policial y nos ta spera cu pa e prome siman di September esaki wordo firma. Despues di esaki, tur partido por traha conforme e acuerdo cu lo wordo firma tanto pa Respaldo como pa Mando Policial,” Lacle a expresa.
Segun Lacle, un acuerdo formal entre ambos instancia lo por contribui na un miho coordinacion y na un maneho mas cla y sigur ora polis mester presta asistencia den casonan relaciona cu salud mental.
