Hoben di 19 aña a perde su bida ora di huy pa Polis

Persecusion a finaliza cu tragedia

• Tur hende ta describi Ayden de Lanoy como hoben keto
• Riba di 10 tiro a wordo scucha eynan 

ORANJESTAD (AAN): Diadomingo marduga alrededor di 5:00 am, diripiente Central di Polis ta haya notificacion di Patruya di Polis di Noord, kendenan ta indica cu den area di Bubali, cerca di Super Food nan a caba di topa cu un auto compacto Toyota Vitz hatchback di 5 porta color shinishi, ta coriendo zig-zag riba caya.  E tabata core bastante roekeloos, y pesey e unidad di Polis a dicidi na bay su tras.

   Nan a notifica Central cu nan a cende nan zwaailicht y sirena pa duna e chauffeur señal pa stop, pero envez di haci esey e persona tras di stuur a djis ignora tur esaki, y mas bien a primi trot pa purba huy di agentenan.  Pero e vehiculo di Polis tin motor mas potente y ta core facilmente su tras.  Asina a pidi Central pa manda mas refuerzo.

   Mientras tanto e auto compacto a sigui haci maniobranan pa purba huy di agentenan, pero cada rato Polis tabata comunica via Tetra Radio pa informa demas unidadnan ta unda nan ta bayendo.

  No kier a stop pa nada: Y nan tabata dirigi nan mes rumbo zuid, pa area di Playa.  Sinembargo ora di yega den area di Paradijswijk, e chauffeur di e Toyota Vitz a djis drenta den zona di Madiki Kavel.

   Polis tabata sigui duna señal pa e para pero e chauffeur no a sigui ordo di patruyanan.

   Informe ta indica cu den Madiki Kavel, cerca di e Compleho di Recreacion di Madiki Kavel, e auto a manera stop como cu el a yega den un caya kizas desconoci.  Polisnan a baha pa asina bay atende e chauffeur.  Aki nan a nota cu ta trata di un persona masculino tras di stuur di e auto cu stuurwiel banda drechi.

   Aparentemente eynan ainda e chauffeur no kier a stop, y dado momento a bira stuurwiel, primi trot y a cuminza manda e auto den direccion di un di e agentenan policial.  Pues e driver a trata di uza su auto “como un arma” pa dal un representante di ley.

   Los monton di tiro: Esaki ta unda cu e Polis na su turno, a saca su arma di candela, y a los tiro den direccion di e chauffeur.  Pero ainda e auto tabata sigui bin dilanti.  Esaki a pone e Polis tira aun mas.

   Loke a socede eynan ainda ta bao investigacion, pero hecho si ta cu tur hende a tende “mas di 10 tiro”.  Finalmente e auto a stop di bay dilanti cu velocidad reduci, y a dal y basha parcialmente abao un cura di hero na un cas.  Y eynan el a keda eynan pega.  Porfin e persecusion a stop, y no ta conoci oficialmente si ta e chauffeur mes a habri su porta banda drechi pa baha abao, of ta Polis a sac’e di auto.  Pero prensa por a mira cu e driver ta benta abao banda di porta di auto, y tin basta sanger na su curpa.

   Polis mesora a pidi pa mas agente yega cerca, pidi pa Ambulance cu sumo urgencia, y tambe pidi autoridadnan halto.

   Hoben di 19 aña: E unidad di Ambulance cu a yega na e lugar di sucedido, a core baha pa brinda asistencia na e chauffer, pero mesora nan a bin nota cu e homber hoben aki no tin señal vital mas.  A indica na Polis cu tin di yama Docter pa bin eynan.

   Vocero Liliana Rasmijn di Polis, a splica cu nan a manda busca e Docter Forensico di Cuerpo Policial, y el a yega y constata morto di e chauffeur masculino di inicial A.C.L. di 19 aña di edad.

   Despues a bin haya sa cu ta trata di Ayden C. de Lanoy di 19 aña, un empleado balente na Save More na Boegoeroei.  E tin un bon voz y na 2019 mes Ayden a participa den Voz-I-Landia Escolar unda el a canta cu un cancion componi pa e artista Jeon.

   Oficialmente no a bisa ta cuanto impacto di bala tin na curpa di e chauffeur, pero presente eynan por a mira autoridad ta registrando riba di 13 huls abao riba caminda.

   A manda busca personal di Recherche, team forensico di BFTO, y tambe Bureau Slachtofferhulp.  Recherche lo bay trata na haya security camera video cu tin instala na casnan den e area, pa asina haya bista claro di loke a socede. Lo bay check tambe si acaso e tin alcohol den curpa, pa mira ta cuanto µg/l e ta registra.  Esey mirando cu e ta coriendo zig-zag riba caminda pa 5:00 am, posiblemente ta biniendo for di Club Nocturno.  Tambe ta bay investiga si e tabata coriendo cu luz paga, of ta e luznan di e auto no tabata funciona, of tabata kima.

   LandsRecherche tambe: Por a nota cu tabatin oficialnan hudicial di LandsRecherche tambe presente, y esaki ta algo segun regla, debi cu ta trata di un caso grave den cual un agente policial ta envolvi.  Fuera di esey, e mesun agente policial den pasado a yega di los tiro den diferente incidente.  Pues tin di bay check si e ta obsesiona cu tiramento, envez di busca otro solucion mas pasivo.

   Mas detaye oficialmente no a drenta.  Pero na e lugar di incidente, a nota cu algun testigo cu conoce e victima, a splica cu loke a pasa cu el a huy di Polis, no ta algo “tipico” y “caracter” di dje.  Nan a describi e hoben como un persona keto, pues e no ta un ‘trouble-maker’, y un bon persona.

   Awor cu e investigacion ta ser haci, e siguiente informenan cu lo bay ricibi lo ta di Ministerio Publico relaciona cu esaki.  Te cu Diadomingo mainta mes no a ricibi e nomber completo di Polis, sino djis inicial.

   DIARIO como tambe Cuerpo Policial Aruba ta manda palabra di condolencia na famia di e fayecido den e caso lamentable aki.