Hit & Run cu baby den auto na Driemasterstraat

ORANJESTAD (AAN):  Den e prome dia di aña nobo, un otro accident serio a tuma luga. Polis y ambulance a bay na e cruzada di Driemasterstraat cu Rudolf Arendsstraat despues di ricibi raport di un hit & run.

            Na e luga di e accident, polisnan a descubri cu un Hyundai Accent di color blanco tabata para, kibra parti dilanti, resultado di e boksmento.

            Loke ta preocupante ta cu, segun e chauffeur di e Hyundai, e otro auto involucra a sali di Rudolf Arendsstraat sin respeta e reglanan di trafico, causando asina e accident y te hasta rana un borchi di trafico tambe.

            Un detaye sumamente alarmante ta cu, segun informacion ricibi, tabata tin un baby den e Hyundai Accent. Aunke e baby no a resulta herida directamente, pa garantisa tur siguridad, ambulance a wordo notifica y Paramediconan a controla e chikitin.

            E comunidad ta keda alerta pa informacion adicional tocante e responsabel di e hit & run, y tur ta spera cu polis por identifica e conductor cu a huy for di e escena. Ta tristo mira cu den e prome dianan di 2024, ta wordo confronta cu un otro evento den trafico manera esaki.