Polis ta partiendo boet...
*Ley mester wordo cumpli!
ORANJESTAD (AAN): Liliana Rasmijn, Vocero di Cuerpo Policial a duna di conoce den entrevista cu DIARIO cu manera DIARIO a trece dilanti caba, mirando e cantidad di reaccion y pregunta cu tin riba rednan social, cu e ultimo dia pa tira klapchi ta 1 di Januari pa 1 or di atardi.
El a remarca cu tin un ley cu ta stipula esey. Ora cu un persona ta wordo gara tirando klapchi despues di e dia y ora stipula, mesora e persona ta haya boet. Polis ta percura pa e ley wordo cumpli y den e caso di boet, Ministerio Publico ta esun cu ta bisa cuanto e boet lo ta.
El a indica tambe cu pa loke ta boet, e ta ancra den ley, pero e ta algo sigur cu mester wordo renoba, actualisa, como tambe hisa e boetnan y impone multanan mas halto cu loke tin ya cu esakinan ta trata di sumanan bieu.
Ora un hende ta tira klapchi despues di 1 di Januari, 1 or di atardi, esaki NO MAG! Pa haci un denuncia por yama central y entrega keho y ohala tin un prueba pasobra ora polis presenta, esun cu a tira klapchi lo a somenta sigur sigur.
Liliana Rasmijn a agrega cu e asunto cu tiramento di klapchi ta un tradicion y cu ta keda tira klapchi te dia di Tres Rey ta esey, un tradicion. Pero mester cumpli cu ley.
Tin casonan special manera ta pidi un permiso (vergunning) pa tira klapchi despues di e fecha stipula, pero esaki ta conta por ehempel, pa e casnan di luz.
Rasmijn a enfatisa cu tanten un ciudadano ta sinti cu e tiramento ilegal di klapchi ta tumando lugar of cu ta un molester, mester yama polis mesora.
El a agrega cu na Aruba tin un comision di Vuurwerk encabesa pa Brandweer. Tin partnernan cu ta forma parti di e comision aki manera Polis, DOW, entre otro.
Lo ta bon pa cuminsa trece e tema aki dilanti den e comision, mirando e cantidad di kehonan cu tabata tin e aña aki, pa haci algo al respecto.
Ministernan, Rocco Tjon y Ursell Arends y sigur Parlamento como representante di pueblo tambe ta wordo pidi pa actua y pa den futuro tene na cuenta cu loke a sosode den e ultimo añanan. Principalmente e ultimo dianan caminda un cantidad record di cacho tabata perdi of a fayece of ainda ta ariba e cayanan di Aruba sin rumbo, spanta ainda y sin refugio.
Tradicion ta algo bon, pero cambio di mentalidad tambe ta bin cu tempo y e tempo ey a yega.
