Hit and Run a costa bida di Ana Rosa Montaño

El a bira di 12 morto den trafico

ORANJESTAD (AAN): Yamada a drenta Diadomingo mainta pa 6:55 am, unda personanan ta informa Central di Polis cu den e yerba di e Linear Park tin un persona benta abao cu sla na curpa.  Nan a informa cu esaki ta na altura di Aruba Surfside Marine.

   Inmediatamente un unidad di Polis di Playa a ser manda eynan, y enberdad net pazuid di caminda, otro banda di e compleho di oficinanan di Lloyd G. Smith Boulevard 12 a bin haya un señora gravemente herida bao di un palo di kwihi.

   Unidad di Ambulans a yega rapidamente, y mesora Paramediconan a nota cu e persona aki ta na bida pero su situacion ta grave.  Ta comosifuera algo a dal’e, mande den halto y peg’e contra e palo di kwihi, y el a cay eybao.

   Polis a cuminza sospecha esey tambe, y pa colmo ta mira rasto di wielnan di un auto cu ta sea subi of baha na banda robez di caminda.  Pues el a subi e acera halto di Linear Park, y lo a dal e peaton aki, y despues a djis sigui core bay.  E chens ta cu e peaton no a ni mira mes kico a bin dal den dje, pues tin chens di e vehiculo a dal e for di angulo patras di su curpa.

   Cu e señora den situacion grave, Paramediconan a opta pa hibe lo mas urgente posible pa Servicio di Emergencia na Hospital.

   Mientras tanto, autoridad a cera e caya aki pa asina evita contaminacion di tur prueba abao riba caminda, y a pone Specialista di Trafico, como tambe personal forensico di BFTO na altura pa analisa tur prueba cu a keda atras.  Claramente a bira convenci cu un vehiculo di motor a baha caminda, subi e acera, dal e señora, y a sigui core lagando e persona gravemente herida atras.  Esaki ta un acto castigable pa ley.

   Vocero policial Liliana Rasmijn a indica, cu lamentablemente na yegada di Ambulans na Hospital, aunke Docternan a traha riba dje pa asina trata na stabiliza su curpa, toch e trauma y golpinan, tabata suficiente pa pone organonan cuminza faya, y el a sucumbi di su heridanan.

   Asina pa 7:49 am, Docter a constata morto di Ana Rosa Montaño Martinez naci dia 16 di Februari 1962 (60 aña) na Republica Dominicana.  Polis lo bay haci uso di cualkier Security Video Camera cu tin instala den e area ey pa por identifica e vehiculo cu a dal den señora Ana Rosa Montaño.  Pesey e investigacion ta sigui.

  Ana Rosa Montaño a bira e di 12 morto den trafico pa 2022.  El a fayece apenas 5 ora despues cu un otro Dominicano tambe a muri den accident tragico na Ponton.

   Cuerpo policial ta haci un suplica, si un persona por a wak algo of sa algo pa yama e tipline di polis cu ta 111-41.

   DIARIO hunto cu Cuerpo Policial ta manda palabra di condolencia na famia di e fayecida.