Accident cu a causa morto di Andre de Cuba
- Diahuebs awor e chauffeur R.C.G. ta dilanti Huez
ORANJESTAD (AAN): E siman aki oficialmente a bira conoci, cu Specialista di Trafico di Cuerpo Policial a logra investiga, busca, y a detene un chauffeur kende lo tabata responsable pa un accident fatal cu a socede dos aña pasa, na altura di e palo grandi di mata cu tin riba caminda di Aeropuerto pa Oranjestad, na altura di Camacuri.
Desde 11 di November 2020 tur hende ta keriendo cu e chauffeur di e Suzuki Baleno color blauw-scur a djis baha di caminda y ocasiona su mesun morto. Pero te awor na 2022 a bin haya sa oficialmente, cu tin un otro vehiculo envolvi den esaki. Nunca ni Ministerio Publico y tampoco Cuerpo Policial no a duna un boletin di esaki.
Pero danki na e bon trabao di Specialista di Trafico, y Departamento di Trafico di Cuerpo Policial, a logra pone man riba un homber di inicial R.C.G., kende ta e persona cu a causa e accident fatal riba un Diaranson anochi 11 di November 2020, pa 11’or di anochi na Camacuri.
R.C.G. tabata manehando un Minivan y segun autoridadnan e tabata coriendo mas duro cu e velocidad maximo di 80 km/h cu tin riba e caminda ey, esta di rotonde Aeropuerto bay pabao rumbo rotonde Las Americas dilanti Cas di Cultura.
Ministerio Publico ta acus’e cu pa su culpa, el a ocasiona un accident di auto unda e chauffeur di un Suzuki Baleno, esta e conocido mecanico y sostenedor deportivo Andre de Cuba di 61 aña a fayece.
Segun Ministerio Publico, e homber R.C.G. a hisa su velocidad te na 95 km/h pa stroba e otro auto di pase. Asina el a cera e Suzuki Baleno aki! Envez di duna e chauffeur chens di pasa auto normal, el a hisa su velocidad di su Minivan pa “pusta cu auto”, y dado momento a core masha cerca cu su Minivan di e otro Suzuki Baleno.
Su actitud riba caminda, a stroba e otro auto y a pone cu e Suzuki Baleno a baha violentamente for di caminda, y a bay dal fuertemente contra e palo di mata. E auto sedan ey a kibra den dos, y causa morto inmediato di e chauffeur Andre de Cuba.
Ministerio Publico ta acusa e homber R.C.G. di a ocasiona e accident aki, y a mustra di no tin nada di compasion cu loke a socede, pasobra el a djis bandona e lugar di accident, siendo cu e tabata sa cu el a caba di ocasiona un accident cu daño grave.
Lo peor di tur esaki, ta cu e ta wordo acusa di a core e Minivan sin rijbewijs. Pues e no tin rijbewijs e anochi ey di 11 di November 2020.
E siman aki den Corte: Danki na e bon trabao aki di Specialista di Trafico, cu sosten di pruebanan forensico acumula pa Departamento di BFTO, y kizas tambe tip cu lo por a ricibi, a logra pone man riba un chauffeur roekeloos cu riba su mes a kere cu ta un Auto Deportivo e ta coriendo, y a dicidi na cera un auto cu tabata pase, y causa un accident ora cu su vehiculo a mishi cu e otro.
Su comportacion riba trafico tabata algo di desaproba, y pesey mes Ministerio Publico ta acusando e homber R.C.G., cu pa su forma di maneha, a bin un dalmento di auto, a consecuencia di cual un persona a fayece.
Ministerio Publico ta nada impresiona cu e ‘rijgedrag’ di e homber R.C.G. riba caminda. Y pesey Diahuebs awor den oranan di merdia, e lo tin 90 minuut di tempo pa responde riba tur e acusacionnan aki dilanti Huez.
Fiscal lo tin sosten di monton di prueba cu a wordo obteni, y lo usa tambe tur e declaracion cu R.C.G. a duna ora di wordo interoga.
Pero lo tin di trece dilanti tambe e sufrimento di famia di Andre de Cuba, su coleganan, y tambe demas personanan activo den mundo deportivo. Andre a fayece lagando su esposa atras, y 4 yiu, di cual 2 ta menor di edad. E tabata un persona balente cu ta specialista den spuit auto, cu ta algo cu el a studia na Merca pe.
Pa hopi tempo, tabata pensa cu e mes lo a baha di caminda, dal violentamente den e palo di mata y kibra e auto den dos. Pero te awor un poco mas despues di 2 aña, ta haya sa cu tin un persona coriendo un Minivan cu ta responsable pa su morto! Y e persona ey manera cobarde a huy despues.
DIARIO a compronde cu famianan di Andre de Cuba mes no tabata na altura cu Polis a logra pone man riba un chauffeur sin rijbewijs cu lo a causa e accident fatal aki dos aña pasa. Diasabra dos siman pasa tabata exactamente 2 aña cu nan a despedi di Andre na Funeraria na San Nicolas.
Nan como famia tambe a sufri hopi a consecuencia di morto di Andre, principalmente e yiunan mas chikito cu diripiente a keda sin tata y pusha nan den dificultad financiero. A lo menos awor nan sa cu posiblemente tin un hende cu ta responsable pa e morto di nan tata, y esaki ta habri mas caminda legal.
E chauffeur lo presenta dilanti Huez, riba Diahuebs 1 di December 2022. Riba e potret por mira e victima Andre de Cuba.
