ORANJESTAD (AAN): Riba Diabierna marduga un poco despues di mey anochi a bati, na momento cu Polis di San Nicolas ta coriendo den Sero Colorado bayendo direccion pabao den area di Rodgers Beach,
na momento di yega na e afdak nan a mira un Toyota Yaris blanco staciona banda di dak.
Ora cu e unidad di Polis a yega cerca di e Yaris, diripiente e chauffeur a pone su auto den reverse, bay inespera patras y despues a bay dilanti cu velocidad halto direccion pariba cu luznan paga.
Durante cu e auto aki a pasa banda di Polisnan, e agentenan a haya holor claramente di marihuana. Nan a nota cu den e Yaris tin cuatro persona sinta.
Polis a bira nan unidad y a sigui tras di e Yaris. Banda di Rum Reef Bar & Grill, Polis a duna e chauffeur señal algun bihaa pa stop. Pero e chauffeur no a cumpli cu esaki. E unidad e ora a manda pidi yudanza di mas Polis.
Ora cu nan a yega na e cruzada-T forma pa First Avenue y 5th Street, e chauffeur a dal un birada inespera direccion man drechi y a subi caya di 5th Street. Despues na e prome cruzada-T banda di e misa, e chauffeur a bira na su man robez. E chauffeur a sigui core cu velocidad halto. Di leu Polisnan a mira con e chauffeur a perde control riba su stuur y despues a bay dal y para net dilanti par di yerbanan grandi.
Polis a yega cerca, y a mira con 3 di e ocupantenan a sali for di e portanan banda drechi y ranca careda bay pabao. Un di e tres hobennan aki tin un shirt geel bisti. Tur tres a bula riba muraya di un cas na Sero Colorado y a desparece den scuridad. E chauffeur mes a desaparece meymey di e yerbanan unda e auto a keda para.
Ora cu Polis a bay check den e auto, a bin haya un grinder pa marihuana, conteniendo tiki di marihuana. Tambe a haya 2 smartphone, di cual uno ta Applie iPhone y e otro ta Samsung. Tambe a bin haya un laptop computer di Samsung Chrome. A bin haya un tas conteniendo placa larga.
Na momento cu mas patruya a yega, nan a controla e area unda e caso aki a socede, pero no a topa cu e hobennan aki mas.
Polis a confisca e Toyota Yaris blanco, y a bay cune Warda di Polis na San Nicolas pa mas investigacion. Tur articulo haya aden a wordo warda den caha fuerte. Na final a pone Central di Polis na altura.
