Habitantenan a kere cu ta homber burachi a drumi abao pero ta auto a dal’e

ORANJESTAD (AAN): Tabata Diamars anochi alrededor di 10:00 pm, Central di Polis a manda unidad di Polis di Savaneta rumbo

pa e caminda di Home Fun Super bay nort direccion Sero Alejandro, pa check un hende drumi banda di caminda.

   Polis a yega na e area, y net dilanti di Savaneta 187 banda di un T-Weg, a bin haya e homber benta abao.  Na prome instante, Polis a conclui cu e persona aki lo a djis bebe demasiado, y a bay drumi eybao.  Pesey a core pidi pa Vehiculo di Transporte bin busk’e, pa asina bay cune Warda di Polis.

   Habitantenan di eybanda tambe a bin mira kico ta pasando, y ningun di nan no conoce e persona drumi abao.  Pues e no ta di e area ey.

   Sinembargo e agentenan a bin nota cu algo no ta corecto cu e persona, y ora cu a bay check su curpa, a bin ripara cu e ta herida.  Pues e por ta victima cu auto of hende a dal’e.  Mesora a pidi Central di Polis pa manda Ambulans pa eynan.

   Como cu el a bira un caso complica, a pidi presencia tambe di Polis di Trafico.

   A bin resulta cu e homber lo a worde gedal cu auto of vehiculo mas grandi, pero e auto a bandona e lugar, y e caso a bira uno di Hit & Run. 

   Personanan cu a yega cerca, a bisa cu nan tampoco no a mira nada externo na e curpa esta golpi of sanger. Paramediconan cu tactica a hisa e curpa riba brancard, y mesora a rush cu e homber direccion Hospitaal.

   Por a mira cu e Paramedico tabata basta bezig cu e victima momento cu tabata transportando e pa Hospitaal. 

   Segun e habitantenan, e homber aki tin varios tattoo na su braza, y e lo por ta un hende entre 30 pa 40 aña.  Polis di trafico tin e tarea awor pa investiga y trata na resolve e Hit & Run aki.

   Si acaso abo a mira algo socede den e area aki riba Diamars anochi, bo por yama Tipline di Polis na 111-41 y duna informacion.  Corda cu bo por keda anonimo.