Autoridad un biaha mas cu razzia na mesun cas na Tamarijn

Mester uza aanhangwagen pa hiba monton di cos horta

• Un persona sorprendi eynan a keda deteni
• Un auto tambe a wordo confisca 

ORANJESTAD (AAN): Autoridadnan hudicial, consistiendo di e.o. Recherche di Santa Cruz, Polis, Unidad di K9, a Team di Aresto, a subi caya Diaranson den oranan trempan di mainta, y a dirigi nan mes na un “cas conoci” den bario di Tamarijn.

    E oficialnan a yega den forma coordina, pa asina rondona full e cas, a cera e meter di awa, y asina cu arma den man a drenta y pone persona cu tabata eyden bay plat na suela.

   Pa bisiñanan, esaki a bira un momento di: “Atrobe?”

   Pasobra ta masha hopi biaha mes a drenta e cas aki y haci detencion. Polis sa con e cas aki ta tanto paden y pafo.

   Oficialnan hudicial e ora a cuminsa rista den e cas, y no por a kere nan wowo. Ta hopi articulo, artefacto, y herment procedente di ladronicia a wordo haya eyden.  A bin haya masha hopi cos horta mes.

   Ta conoci cu hopi biaha den e cas aki, a bin haya Powertools cu parce ta faborito di ladron pa horta.  Tambe a haya un generator color blauw cu emblema di Ford riba dje, un estuche di router tool marca Yeti, taira geel, circle saw color blauw, varios Bluetooth Speakers marca Xtreme den nan caha y tambe los, diferente smartphone y tablets, y varios herment di compressed air.

   Por a mira cu a confisca sea un compressor grandi of ta generator full desarma, taira di vehiculo, kabelnan na gran cantidad, diferente maleta pa viaha, di colornan blauw, shinishi, biña, y uno berde scur.  A confisca 2 of ta 3 split-units di airco basta grandi di marca Boreal, cu nan blower-units ainda den caha, reem di auto Nissan, jumping cables, ekipo di pesca, y varios wiel cu taira di truck.

   Pa documenta tur esaki, a manda busca team forensico di BFTO tambe pa haci analisis.  Tambe a confisca un vehiculo.

   Vocero di Polis Liliana Rasmijn, a confirma na prensa cu a bin haya droga tambe.  Esakinan a wordo confisca mesora, y pasa pa Departamento di Narcotica.

   E cantidad di articulo cu a wordo confisca ta asina hopi, te cu Polis mester a manda busca un Pickup cu a yega cu un aanhangwagen na dje.  Di e forma ey por a logra transporta tur loke a ser haya, pues nan ta hopi.

   Corda cu si acaso abo cumpra articulo horta, esey tambe ta cay bao di encubrimento y ta castigabel pa ley.  Ultimo lunanan, DIARIO a tuma nota cu varios persona ta aparece den Corte pa motibo di e casonan di ‘heling’ aki.

   Polis ta sigui pidi cooperacion di pueblo pa duna tip na Tipline 111-41 pa yuda stop crimen riba e isla.  Corda cu bo por keda anonimo.