Guardacosta di Caribe Hulandes a los tiro y mata un narcotraficante riba Speedboat

Confisca cargamento di 33.8 miyon Dollar di droga

ORANJESTAD (AAN): E transporte di droga for di Colombia rumbo pa Centro America, rumbo pa Venezuela, rumbo pa Islanan ABC, y tambe rumbo pa Republica Dominicana a aumenta drasticamente ultimo lunanan.

   Esey ta loke recien autoridadnan Mericano mes via di CBP su oficina na San Juan (Puerto Rico) a divulga den un relato pa prensa.

   Y den area di Caribe, tin tantisimo vigilancia tumando lugar for di halto.  Avionnan di Guardacosta Mericano, avionnan di CBP di Puerto Rico, avionnan di Guardacosta di Caribe Hulandes, y hasta Drones ta bulando pa detecta speedboat cu ta moviendo cu droga cruzando Caribe.

   E siman aki, e barco di marina, Zr.Ms. Groningen cu e temporada aki ta nabegando pa Guardacosta di Caribe Hulandes, a detecta un speedboat moviendo rapidamente cruzando Lama Caribe.

   For di avion a detecta cu den e Speedboat aki tin cinco persona, kendenan na momento cu a ripara cu autoridad a ripara cu nan ta moviendo, a cuminza benta un monton di bola grandi den lama.  E bolanan aki hopi biaha ta contene pakinan di droga.

   Personal di Guardacosta di Caribe Hulandes a subi lama cu nan Speedboat modelo FRISC pa asina trata na obliga e Speedboat cu narcotraficantenan abordo pa stop.  Pero ni maske kico nan a haci, e Speedboat clandestino tabata sigui cruza lama.

   Esey a pone cu e personal di Guardacosta a cuminza los tiro di advertencia, dirigi riba e lama nan dilanti.  Normalmente esaki ta yuda den mayoria caso pa e tripulantenan dicidi mihor nan stop e Speedboat.

   E biaha aki, esey no a yuda.  Den casonan asina, e ora ta busca forma pa tira riba e Outboard Engine di e Speedboat pa paraliza e boto.  Pero e biaha aki, e Speedboat aki tin motor interno, pues no tin nada di motor poni pafo.

   No a keda nan nada otro pa cuminza mik y tira riba e area unda e motor ta.  Kico a pasa exactamente tin di wordo investiga, pero hecho ta cu un di e miembronan di tripulantenan den e Speedboat a haya tiro.

   E impacto di bala aki riba e narcotraficante a causa su morto.  Asina tambe e Speedboat porfin a stop di move, y e oficialnan abordo a detene e otro 4 persona.

   Mientras tanto e boto di Zr.Ms. Groningen a haci e trabao pa recoge tur e bolanan cu a wordo benta riba lama y cu a keda drief.  Despues tur e droga ey, hunto cu esnan cu ainda tabata den e Speedboat a wordo pisa.  Esaki a yega na un peso di 1.620 kilo di cocaina.

   Riba mercado na Merca, esey tin un balor di 33.8 miyon Dollar.

   E cuatro sospechosonan, fuera esun cu a fayece, y e cargamento di droga a wordo hiba na Curaçao, unda nan a ser poni den man di Cuerpo Policial di Curaçao pa asina haci e investigacion.

   Como cu Guardacosta tabata envolvi den e caso pa intercepta e droga, y un hende a perde su bida, automaticamente LandsRecherche na Curaçao tambe a wordo envolvi den e asunto pa haci investigacion.