ORANJESTAD (AAN): Sindicato di Polis ta kere cu awor si ya no por sigui keda di ta victima di retrazonan
asina mahos cu ta sigui pasa den Departamento di DRH cu ta atende promocionnan cu un monton di funcionario policial tin di ricibi.
Sindicato SPA pa e motibo ey riba Diaranson a reuni cu DRH pa haya sa di con e promocionnan aki ta tranca asina.
Algun agente ta wardando mas di 2 aña riba e bevordering keda cla. Y e ta afectando varios oficial di diferente rango.
Polisnan cu rango di ‘Agent’, ta wardando pa haya promocion pa ‘Agent 1e klasse’. Tambe esnan di ‘Agent 1e klasse’ wardando pa haya bevordering pa ‘Brigadier’. Tambe esnan di ‘Brigadier’ wardando pa haya promocion pa ‘Brigadier 1e klasse’.
Tambe diferente ‘Brigadier 1e klasse’ wardando nan bevordering pa ‘Hoofdagent’. Tin hopi ‘Hoofdagent’ wardando riba nan promocion pa bira ‘Onder-Inspecteur’, y esnan cu ya ta ‘Onder-Inspecteur’ pa bira ‘Onder-Inspecteur 1e klasse’.
Sindicato SPA ta admiti cu e lista ta largo, y pesey mes e momento a yega pa cuminza haya contesta riba tur e inquietudnan aki. A reuni tambe cu Ministro Tjon riba e asunto. Segun SPA, nan a yega na un solucion riba e asunto aki, y awor tin di bay informa e miembronan di esey.
