Grupo di 25 Polis a haya diploma riba diferente estudio policial

ORANJESTAD (AAN): Recientemente alto comisario di Polis drs. Ramon Anrhem a entrega di 25 diploma na agente policial di diferente rango.

Despues di algun luna di estudio intensivo ariba diferente nivel y direccion policial tur a termina e estudio exitosamente.

   Ta trata aki diferente estudio policial manera instructor di tiramento, Polis di Bario como tambe incidente cu ta involucra arma di candela.

   DIARIO a compronde cu e tres estudionan aki tabata intensivo pero na final a logra exitosamente conhuntamente cu yudansa di Academia di Polis Hulanda cu a brinda y ta brindando sosten na Cuerpo Policial Aruba. Cu e colaboracion aki e agentenan ta haya oportunidad di sigui crece y amplia nan conocimiento riba diferente area.

   For di e 25 Polis cu a termina nan estudio tabata entre otro: 2 pa incidente cu ta involucra arma di candela, 4 instructor di tiramento y 19 pa Polis di Bario.

   Alto comisario Arnhem ta satisfecho y hopi contento cu e acogida y bon resultado di cada un Polis cu a participa na e estudio aki. Di e forma aki ta sigui inverti den estudio y curso pa e agente policial por sigui progresa y mehora den nan carera profesional di Polis.