ORANJESTAD (AAN): Tabata Diamars marduga cu un di e habitantenan di e cas Papilon 23-F a tende algo inusual.
El a dicidi lanta y a sinti holor fini di huma. Ora di a sali di camber y drenta pa sala, a bin haya esaki na candela cu vlamnan grandi.
Mesora a bati alarma pa asina e dos otro habitantenan a wordo spierta, y por a core sali di e cas. Centro di Alarma mesora a dirigi dos unidad di Bombero, y Polis a wordo informa.
E teoria ta cu e candela lo por a start den e veranda, unda tin e fusebox di coriente poni. El a expande bay halto kima blafon, y asina sigui bay y cuminsa kima paden tambe.
Polis a pidi yudansa di Bureau Slachtofferhulp pa bin brinda sosten na e famia, y como cu un habitante femenino a bira hopi emocional, a manda busca Ambulans tambe pa asina bin check e persona. Paramediconan a brinda asistencia eynan mes, y no mester a hibe pa Hospital.
