Ganadornan di Aruba Caiso & Soca Monarch 2023 a ricibi nan premio

ORANJESTAD (AAN):  Aruba Caiso & Soca Monarch 2023 un biaha mas tabata un gran exito. Stichting Musica ta elogia e esfuerzo cu cada participante ta haci pa por forma parti di e festival.

             Nos artista, banda y musiconan tin e rol di mas grandi y ta e curason di e festival y pa e motibo aki e organisacion semper a cumpli cu e pago di premio na e ganadornan di Aruba Caiso & Soca Monarch prome cu e temporada carnavalesco culmina.

            Riba diaranson, 15 di februari 2023, Stichting Musica a entrega un total di Awg. 64.700 na premio na e monarcanan di e festival. E entrega di premio a tuma lugar na Balashi Beer Garden den un ambiente ameno y banda di e musiconan ganador, a conta cu presencia di miembronan di prensa y e diferente partners y colaboradornan di festival cu a extende palabranan caluroso na e ganadornan y tur participante di e festival.

           Un festival cu ta wordo considera sumamente importante pa cultura di Aruba.

            Tur banda y cantante cu a cualifica pa e anochi final di Aruba Caiso & Soca Monarch 2023 tambe a ricibi   nan premio y riba dialuna, 20 di februari 2023, Stichting Musica lo anuncia e ganador di “Band of the Year”. Un incentiva di 5000 florin pa e banda cu mas a aporta na Carnival 69.

            E resultado lo wordo publica riba e Facebook page di Stichting Musica y tambe lo wordo anuncia na prensa en general pa 3’or di atardi.

            Durante di e anochi e president di Stichting Musica, Edwina Werleman, a anuncia cu e inscripcion pa Aruba Caiso & Soca Monarch 2024 lo habri riba diadomingo, dia 16 di April 2023. Esaki tambe lo ta e fecha di e prome reunion cu tur Band Leaders, relata na Aruba Caiso & Soca Monarch 2024. Tambe a divulga, cu e Prefinals di Aruba Caiso & Soca Monarch 2024 lo tuma lugar na luna di oktober 2023.

            E organisacion ta premira 4 anochi di Prefinals, mirando e entusiasmo cu ya ta reinando pa Aruba Caiso & Soca Monarch 2024. E anochi final pa e Caiso Monarch lo tuma lugar riba 19 di januari 2024 y e Super Saturday Soca Monarch lo ta riba dia 20 di januari 2024.

            Stichting Musica ta convenci cu e formula nobo, cu prefinals tumando lugar di antemano, ta uno positivo y cu por a mira su frutonan den e forma cu e produccionnan a biba den pueblo for di comienso di 2023, desde e prome parada di Carnaval. Varios artista a uza e oportunidad pa graba nan cancion profesionalmente y lansa videoclips.

             Stichting Musica kier sigi apoya e esfuerzo di nos artistanan local y y brinda e espacio necesario pa cada produccion cu participa na Aruba Caiso & Soca Monarch 2024 por briya y ricibi e atencion cu e merece.