ORANJESTAD (AAN): Mientras cu Aruba tabata celebrando Carnaval 69 den cayanan di Oranjestad, ata Diadomingo atardi banda di 4:00 pm e yamada a drenta cu tin tiramento andando den Sero Patrishi.
Mesora un unidad di Polis di Playa a ser manda na e adres aki, cu ta keda na e compleho di casnan di pueblo na Sero Patrishi.
Riba e acera net mey-mey di Sero Patrishi 322-C y tambe Sero Patrishi 322-E, agentenan a bin topa cu manchanan procedente di sangramento profuso di un herida. Esaki ta net patras di un Chevrolet Spark cu ta staciona riba acera.
Pero no tabatin ningun victima presente. Pero mesora diferente persona eybanda a yega cerca, y a informa Polis cu un hoben a wordo tira, y cu un bisiña eybanda mes a start su Toyota Yaris, y a dune un lift pa hibe lo mas urgente pa Hospital.
Inmediatamente e unidad di Polis di Playa a raporta cu e victima ta rumbo pa Hospital.
E momento ey un otro unidad di Polis cu tabata riba caya, a topa cu e Toyota Yaris aki moviendo rumbo pa Hospital. E oficialnan di Polis a bay su dilanti, y cu sirena a escolta e auto pa asina e por yega sin problema pa Hospital.
Aki mesora el a wordo hiba paden di Servicio di Emergencia di Hospital, unda cu a cuminza cu e proceso. Polis aki a mira cu e hoben tabata sangrando bastante for di e parti di abdomen. Unda exactamente e impacto di bala a dal na su barica, no ta conoci.
Mientras tanto, mas unidad di Polis a wordo manda pa Sero Patrishi pa asina sella e lugar di crimen, y otro unidadnan mas a bay Hospital pa sostene e agentenan presente, y dado momento a hasta cera e entrada di Servicio di Emergencia pa autonan no-autoriza no bay paden. Aki posiblemente na Hospital lo tin di opera e victima, pa asina stop cualkier hemoragia interno.
Recherche di Oranjestad a wordo yama, y nan a acudi tambe na Sero Patrishi, y a pone personal forensico di BFTO tambe na altura pa bay na e lugar. Esnan eybanda mes a informa Polis ta kende e persona cu a tira ta. El a wordo identifica y Polisnan a haya sa cu despues di tiramento a drenta un Pickup y a huy di e area.
Tambe a haya sa, cu e victima ta yiu di un agente policial.
Polis y Recherche tin e investigacion pa haya sa pa ki motibo tabatin tiramento riba Diadomingo atardi.
