Fundacion Balorando Polis Pensionado cu bunita celebracion di Dia di Pensionado

ORANJESTAD (AAN) Fundacion Balorando Polis Pensionado ta conoci pa e aprecio y gratitud cu nan ta demostra pa tur e polisnan cu a forma parti di Cuerpo Policial y cu aworaki ta gozando di nan pensioen mereci, sin laga atras e recuerdo di e polisnan cu no t’ey mas, y tambe ta haya palabranan di gratitud pa e trabao cu nan a realiza den bida.

  Cu un bunita ricibimento cu un glas di oranje juice, cada polis cu nan invitado a wordo yama bon bini, na porta di Centro di Bario Dakota, unda cu nan a wordo festeha. Nan a sinta den grupo y ya cu e sala casi yen, meneer Emiliano a hiba palabra, yama nan pabien, gradici nan presencia, y a pidi un minuut di silencio pa honra e memoria di esnan cu Dios a yama den Su Reino.

   Dos persona a wordo menciona pa nan trabao den nos comunidad. Uno ta Shon Pe Krozendijk kende a fungi, entre otro, como vocero di KPA pa varios aña, un polis ehemplar, hopi stima den e Cuerpo, y den comunidad. E otro persona ta meneer Pedro Valentin, invitado di un polis pensiona.

   Un pareha hoben di animador a set up un bunita programa cu tur hende a goza di dje, cuminzando pa un puzzle cu a genera tres grupo ganador. A sigui cu un Seso Sport, cu diferente pregunta tocante Aruba mes, unda tambe diferente grupo a gana punto. Esaki tabata e reto menos facil, pero hopi interesante. Finalmente, a pone varios cantica cu mester a bisa nan nomber y esnan cu kier a los pia por a haci’e y e tabata tremendo! Tur grupo a haya punto, y como recompensa esun mas anima y creativo a haya un cinta di distincion. Cu ticket di entrada su dos ultimo number a gana premio, y a conclui cu un dushi lunch y di postre un tremendo kesiyo. Hopi great di berdad y masha danki na e Fundacion Balorando Polis Pensionado pa un bunita manera di honra e polisnan aki, cu a traha incansablemente riba e seguridad di nos pueblo.

Redacta pa M.Abdul