ORANJESTAD (AAN): Cuerpo Policial a informa diahuebs cu en conexion cu caso andando di soborno (tuma placa pa regla permiso ) a detene un hende homber R.J.G.K. naci na Curacao di 48 aña.
Si tin persona cu a duna e sospechoso aki placa pa supuestamente regla un permiso di estadia of pa permiso di trabou pa nan por pasa libremente na oficina di recherche Oranjestad ( DAR1) na Wayaca y entrega keho.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey ta pidi si bo tin cualkier informacion yama tiplijn: 11141. KPA ta garantisa cu bo ta keda anonimo.
E sospechoso ta e conocido Radi Khan (Radighmyr Abdoel-Khan), kende ta un persona basta conoci den su papel di 'coordinador' di ex Minister Benny Sevinger durante e gobernacion di Partido AVP. Mester por corda cu Sevinger tabata encarga tambe cu e maneho di stranheria.
Recien, Khan a cuminsa realisa trabaonan di regla permisonan di estadia of trabao (tramitador). E tabata tin un oficina unda e tabata haci esaki.
Recherche Oranjestad a atende cu su detencion y awor investigacion ta andando den e caso aki pa sospecho di soborno.
