ORANJESTAD (AAN): Diasabra marduga un grupo a dicidi na organiza un actividad di core Off-Road cu nan vehiculonan 4x4 na costa panort di Aruba.
Aunke mayoria di participantenan a atene nan mes na forma safe coriendo den e area robusto aki di e isla, diripiente un vehiculo 4x4 a bolter, y a keda cu su cuatro wielnan den halto y cu hende herida y pega bao di e vehiculo.
Aki ta unda cu Polisnan a ser yama, y ta diferente unidad policial, hunto cu Ambulance, y tambe Cuerpo di Bombero a mobiliza pa e area di desgracia. Na yegada a bin topa cu un cantidad grandi di hende y vehiculo 4x4 na costa.
A resulta cu un vehiculo Jeep Wrangler a bolter, y demas hendenan eybanda a core yega, y cu forza di musculo a sa di hisa e vehiculo pa reduci presion riba e dos persona herida. Bombero a yega y a duna un man.
Durante tur e trabao di rescate, un oficial di Polis tambe a pasa den problema riba e tereno aki, y el a cay y cay y ricibi fractura na su pia. E tambe a wordo rescata, y un Ambulance mas a bay eynan pa yuda e agente policial.
En total 3 persona (incluyendo e Polis) a wordo hiba pa Hospital.
