Accident di dos auto riba Avenida Nelson Oduber y palo di luz a wordo ranca

ORANJESTAD (AAN): Tabata Diadomingo marduga, cu Central di Polis a ricibi informacion cu riba e caminda di Avenida Nelson Oduber for di Super Food bay nort direccion rotonde Palm Beach,

tin un accident pisa a caba di socede.  Nan a raporta cu e ta den area poco pariba di ex-House of Cheng.

   Ora cu e prome unidad di Polis a yega, a bin topa un accident caminda tin dos auto destrui, y un palo di luz a wordo ranca completamente.

   Un di e autonan tipo sedan color blanco a finaliza pariba di caminda, y e otro auto sedan color blanco tambe a finaliza pabao di caminda, mey-mey di e separador di dos vianan.

   E heridonan tabata den e auto cu a finaliza banda pariba, un homber y muhe. E muhe tabata seriamente herida y tabata tin mester di ambulance cu urgencia.  E homber tambe tabata herida, pero mester a warda pa e siguiente ambulance.

   Ambulance a transporta e muhe cu urgencia pa Hospitaal, algun rato despues ambulance a yega pa busca e homber cu e sinta den un auto eybanda.  Ora Paramediconan a yega e curpa a bira mas dolor y mester a yude sali di e auto.

   Posiblemente tabata trata di velocidad hopi halto entre e dos autonan.  Personal di NV Elmar a wordo notifica.