Un futbolista conoci di SV Bubali
ORANJESTAD (AAN): E prome yamada cu a drenta Diasabra atardi pa 3:25 pm na Central di Polis, a pone mobiliza mesora unidadnan di Polis cu urgencia rumbo pa un cas na Bubali pa un caso lamentabel cu a wordo descubri eynan. Fuera di esey a manda autoridad hudicial tambe na e lugar.
E yamada ta cu un persona a pone fin na su bida, y e prome unidad di Polis cu a yega na e cas na Bubali 37, a confirma esey y indica cu e lo a comete e acto serio aki uzando un arma di candela.
Unidad di Ambulans tambe a wordo manda na e lugar pa check si por tin yudanza ainda.
Paramediconan a baha y core bay check e victima, y a bin nota cu e no tin ningun señal vital mas, y a recomenda Polis pa yama Docter. Polisnan mientras tanto a pone autoridadnan halto na altura, y Recherche na su turno a manda team forensico di BFTO na e lugar. Bureau Slachtofferhulp tambe a yega na e lugar pa yuda cu famia.
Docter forensico Dr. Wemejier a presenta na e lugar, y el a constata morto di e ciudadano Eric Efraim Tromp, naci dia 8 di Februari 1958, y biba na Bubali 37. Pues e tin 68 aña di edad.
Eric ta un persona hopi conoci den area di Bubali, y pa hopi aña tabata integrante di team di futbol di SV Bubali. E tin un gran amor pa deporte, y futbol en particular.
Famianan a yega y tabata den inmenso tristeza. Nan a relata cu Eric a bin ta sufriendo ultimo tempo di un malesa cu a afecta su trankilidad di bida, y ultimo temponan hendenan a mire baha hopi di peso. Kizas e dolor y sufrimento tabata demasiado pe, te cu el a dicidi na comete e acto di mas severo contra su mesun curpa.
Recherche a start un investigacion pa descarta cualkier acto di crimen den e morto di Eric. Despues e curpa a wordo saca di e cas cu shersh di funeraria.
Na famia di e fayecido, incluyendo tur esnan di SV Bubali, tanto DIARIO como Cuerpo Policial ta extende e mas profundo palabra di condolencia.
